Արտաքին հարաբերությունների կոմիտեի նախագահ Նիկոլոզ Սամխարաձեն հանդիպել է Վրաստանում Կատարի Պետության դեսպան Հասան Ահմեդ Ալ-Մուտավայի հետ։

Կողմերը խոսել են երկու երկրների քաղաքական հարաբերությունների և տնտեսական համագործակցության զարգացման մասին։ Ընդգծվել է միջխորհրդարանական հարաբերությունների խորացումը: Հանդիպմանը քննարկվել է նաև տարածաշրջանային անվտանգության միջավայրը, ներառյալ Հարավային Կովկասում և Մերձավոր Արևելքում ընթացող իրադարձությունները։

«Կատարի դեսպանի հետ հանդիպմանը մենք նշեցինք, որ երկու երկրների քաղաքական հարաբերությունները գտնվում են բարձր մակարդակի վրա, և մենք ցանկանում ենք էլ ավելի զարգացնել տնտեսական համագործակցությունը, այդ թվում՝ ազատ առևտրի ուղղությամբ», – ասել է Նիկոլոզ Սամխարաձեն։

Նիկոլոզ Սամխարաձեն պաշտոնական այցով Վրաստան է հրավիրել Կատարի օրենսդիր մարմնի արտաքին հարաբերությունների կոմիտեի անդամներին։

Տեղեկությունը տարածում է Վրաստանի խորհրդարանի մամուլի ծառայությունը։