Վրաստանի խորհրդարանի արտաքին հարաբերությունների հանձնաժողովի նախագահ և ճապոնական խորհրդարանի հետ բարեկամության խմբի ղեկավար Նիկոլոզ Սամխարաձեն, տնտեսական քաղաքականության հանձնաժողովի նախագահի առաջին տեղակալ Իրակլի Մեզուրնիշվիլու հետ միասին, հանդիպել են Ճապոնիայի Ներկայացուցիչների պալատի անդամներ Կարեն Մակիշիմային և Հիդետո Կավասակուն։ Այս մասին տեղեկացնում է Վրաստանի խորհրդարանի մամուլի ծառայությունը։

Նրանց հաղորդմամբ՝ հանդիպման ընթացքում կողմերը քննարկել են խորհրդարանական համագործակցության խորացման և հաջորդ տարի նախատեսված փոխայցերի կարևորությունը։

«Հանդիպման ընթացքում ուշադրություն է դարձվել Վրաստանի և Ճապոնիայի միջև համագործակցությանն ու այդ ուղղությամբ նախատեսվող կոնկրետ նախագծերին։ Քննարկվել են նաև բնական աղետներին արձագանքման մեխանիզմների ստեղծման և կանխարգելման հարցերը, որոնցում Ճապոնիան մեծ փորձ ունի։

Հանդիպմանը քննարկվել է Վրաստանի և Ճապոնիայի միջև համագործակցությունը նաև կիբերանվտանգության ոլորտում։

Երկկողմ ապագա հարաբերությունների թեմայի շրջանակում կողմերը քննարկել են Ճապոնիայի Հակոնե և Վրաստանի Ծղալտուբո քաղաքների քույր քաղաքներ դառնալու հնարավորությունը։ Նշվել է, որ երկու քաղաքն էլ հայտնի են որպես առողջարանային վայրեր՝ բուժիչ ջրերով։

Խորհրդարանում կայացած հանդիպմանը մասնակցել են Ճապոնիայի Ներկայացուցիչների պալատի անդամներ Կարեն Մակիշիման և Հիդետո Կավասակին՝ վերջինս նաև Ճապոնիայի թվային փոխակերպման խորհրդարանական փոխնախարարն է։ Նրանք երկուսն էլ հանդիսանում են Վրաստանի խորհրդարանի հետ բարեկամության խմբի անդամներ։

Հանդիպմանը մասնակցել է նաև Վրաստանում Ճապոնիայի արտակարգ և լիազոր դեսպան Իշիզուկա Հիդեկին», – ասված է խորհրդարանի մամուլի հաղորդագրությունում։