Արտաքին հարաբերությունների կոմիտեի նախագահ Նիկոլոզ Սամխարաձեն հանդիպել է Վրաստանում Չեխիայի Հանրապետության արտակարգ և լիազոր դեսպան Պետր Կուբերնատի հետ։

Խորհրդարանի մամուլի ծառայությունից հայտնում են, որ կողմերը քննարկել են Վրաստանի և Չեխիայի միջև առկա հարաբերությունները, ինչպես նաև խորհրդարանական մակարդակով համագործակցության ամրապնդման, առևտրատնտեսական հարաբերությունների խորացման հնարավորությունները։ Ընդգծվել է Չեխիայի կողմից Վրաստանի շրջաններում իրականացվող նախագծերի կարևորությունը։

Հանդիպման ընթացքում խոսվել է Վրաստանի եվրաինտեգրման, իշխանության ձեռնարկած քայլերի և ակնկալիքների մասին։

«Մենք հետաքրքիր հանդիպում ունեցանք Չեխիայի Հանրապետության նորանշանակ դեսպանի հետ, որտեղ վերանայեցինք երկու երկրների համագործակցության հիմնական ասպեկտները։ Դեսպանը ևս մեկ անգամ մեզ հաստատեց Չեխիայի ամուր աջակցությունը մեր երկրի եվրաինտեգրման ճանապարհին»,- ասել է Նիկոլոզ Սամխարաձեն։

Նիկոլոզ Սամխարաձեն Չեխիայի դեսպանին տեղեկացրել է Ռուսաստանի կողմից օկուպացված շրջաններում ստեղծված ծանր իրավիճակի և չճանաչման քաղաքականության կարևորության մասին։

Տեղեկությունը տարածում է Վրաստանի խորհրդարանի մամուլի ծառայությունը։