Վաղուց է մենք չենք լսում Արեստովիչի հայտարարությունները և լուրջ չենք վերաբերվում,- ասել է Վրաստանի խորհրդարանի արտաքին հարաբերությունների կոմիտեի նախագահ Նիկոլոզ Սամխարաձեն։

Նիկոլոզ Սամխարաձեն մեկնաբանել է Ուկրաինայի նախագահի վարչակազմի խորհրդական Ալեքսեյ Արեստովիչի հայտարարությունը, որտեղ նա նշել է, որ Վրաստանի իշխանությունը ռուսամետ կուրս է վարում։

«Ուղիղ երկու օր առաջ ես խոսեցի Ուկրաինայի արտաքին գործերի նախարարության հայտարարության մասին և ասացի, որ դա լավ հայտարարություն է, բայց ի՞նչ անենք Արեստովիչի, Պոդոլյակի և Դանիլովի հայտարարություններին։ Արեստովիչը չվարանեց և հերթական հայտարարությունն արեց: Մենք վաղուց չենք լսում Արեստովիչի հայտարարությունները և լուրջ չենք վերաբերվում, այնուամենայնիվ, հարց ունեմ Ուկրաինայի ԱԳՆ-ին՝ ի՞նչ են անում, սա համարում են պաշտոնական հայտարարություն, թե՞ ոչ։ Ես չեմ պատրաստվում արձագանքել Արեստովիչի հայտարարությանը, քանի որ դա անիմաստ է։ Այս հայտարարության նպատակն է ինչ-որ կերպ վնասել մեզ՝ «Վրացական երազանքին», վրացական պետությանը։ Եթե ​​կարծում են, որ սա կօգնի Սաակաշվիլիին, շատ սխալվում են»,- ասել է Սամխարաձեն։