Նիկոլ Փաշինյան. Եթե իրականացվի «Խաղաղության խաչմերուկ» նախագիծը, հնարավոր կլինի երկաթուղային հաղորդակցություն իրականացնել Պարսից և Օմանի ծոցերի հետ, Իրանը ելք կստանա դեպի Սև ծով, ապա՝ դեպի Արևմուտք
«Խաղաղության խաչմերուկ» նախագծի իրականացման դեպքում հնարավոր կլինի երկաթուղային հաղորդակցություն Պարսից ծոցի, Օմանի ծոցի հետ, իսկ Հայաստանի տարածքով Իրանը ելք կունենա դեպի Սև ծով և ավելի դեպի Արևմուտք, Իրանի պետական հեռուստատեսությանը տված հարցազրույցում ասել է ՀՀ վարչապետ Նիկոլ Փաշինյանը։
Ըստ ՀՀ կառավարության ղեկավարի, Հայաստանը կարող էր Իրանի Իսլամական Հանրապետության համար ամենակարճ և ամենահարմար երթուղիներից մեկը լինել դեպի արևմուտք, սակայն այսօր երկաթուղային փոխադրումներ իրականացնելու հնարավորություն չկա։
Ըստ Փաշինյանի՝ Հայաստան-Իրան երկաթուղու կառուցման հարցը վաղուց քննարկվում էր, սակայն տեղանքով պայմանավորված՝ նման երկաթուղին շատ մեծ ներդրումներ է պահանջում, և այսօրվա պայմաններում դեռ արդարացում չկա, որ հնարավոր բեռնափոխադրումները կվճարեն այդ ծախսերը։
«Այսօր հսկայական բեռնափոխադրումներ են սպասվում արևմուտքից արևելք, հյուսիսից հարավ, և եթե մեր տարածաշրջանային տրանսպորտային և տնտեսական հաղորդակցությունները բացվեն, այդ բեռների ծավալն այնքան մեծ կլինի, որ Հայաստանի, Իրանի Իսլամական Հանրապետության, Ադրբեջանի և Թուրքիայի ենթակառուցվածքները չեն բավարարի այդ հոսքը սպասարկելու համար։ «Սա նաև հիանալի հնարավորություն է տալիս մտածելու տարածաշրջանային համագործակցության նոր ենթակառուցվածքային նախագծերի մասին»,- ասաց Նիկոլ Փաշինյանը։