Մեր երկրների համագործակցությունը գործնական օրինակ է այն բանի, թե ինչպիսին պետք է լինեն տարածաշրջանի երկրների հարաբերությունները, ասել է Հայաստանի վարչապետ Նիկոլ Փաշինյանը Վրաստանի վարչապետ Իրակլի Կոբախիձեի հետ համատեղ ճեպազրույցում։

Հայաստանի կառավարության ղեկավարը շնորհակալություն է հայտնել Իրակլի Կոբախիձեին ջերմ ընդունելության համար և նշել, որ Վրաստանի և Հայաստանի միջև ռազմավարական գործընկերության համաձայնագիրը կենսունակ մեխանիզմ է՝ հիմնված փոխադարձ շահերի վրա։

«Ուրախ եմ հերթական անգամ լինել մեր բարեկամ երկրում՝ Վրաստանում։ Շատ շնորհակալ եմ ավանդական ջերմ ընդունելության և հյուրընկալության համար, որին արժանացավ իմ պատվիրակությունը վերջին շրջանում։ Մեզ հաջողվեց ընդլայնել համապարփակ համագործակցությունը Վրաստանի և Հայաստանի միջև բոլոր ոլորտներում։ Դրա լավագույն ցուցանիշն այն է, որ այս տարվա հունվարին երկրների միջև համագործակցությունը բարձրացավ ռազմավարական գործընկերության ավելի բարձր մակարդակի։ Այսպիսով, մեզ հաջողվեց ստեղծել արդյունավետ շփումների կենսունակ մեխանիզմ՝ հիմնված փոխադարձ շահերի, ինչպես նաև ընդհանուր սկզբունքների և ժողովրդավարական արժեքների վրա։

Վրաստանն ու Հայաստանը անվերապահորեն ճանաչել են միմյանց տարածքային ամբողջականությունն ու ինքնիշխանությունը։ Սա Հարավային Կովկասում կայունության և երկարատև խաղաղության հասնելու կարևոր գործոններից մեկն է»,- ասել է Նիկոլ Փաշինյանը։