Հայաստանի Հանրապետության վարչապետ Նիկոլ Փաշինյանը նշել է այն պայմանները, որոնց կատարման դեպքում Երևանը պաշտոնապես կդիմի ԵՄ-ին անդամակցության համար։

«Արմենպրես»-ի փոխանցմամբ՝ Փաշինյանը խոսել է այս հարցի մասին՝ ներկայացնելով իշխող կուսակցության՝ «Քաղաքացիական պայմանագրի» նախընտրական ծրագիրը։

«Հայաստանի Հանրապետությունը կշարունակի իրականացնել անհրաժեշտ բարեփոխումները՝ Եվրամիության անդամակցության չափանիշներին համապատասխանելու համար, մինչև լիովին բավարարի այդ պահանջները: Երբ Հայաստանը համապատասխանի չափանիշներին, անդամակցությունը կդառնա քաղաքական որոշման հարց և կախված կլինի նրանից, թե արդյոք Եվրամիությունը պատրաստ է ընդունել Հայաստանին: Եթե այն պատրաստ լինի, ապա Հայաստանը կդիմի լիիրավ անդամակցության համար: Հակառակ դեպքում, վերը նշված բարեփոխումների իրականացումը դեռևս կհամարվի ռազմավարական նվաճում, քանի որ Հայաստանը լիովին կհամապատասխանի եվրոպական չափանիշներին», – ասել է Փաշինյանը։

Բացի այդ, ինչպես նշել է Փաշինյանը Եվրասիական տնտեսական միության հետ հարաբերությունները քննարկելիս, Հայաստանի կառավարությունը գիտակցում է, որ անհնար է միաժամանակ լինել և՛ Եվրասիական տնտեսական միության, և՛ Եվրամիության անդամ։

«Այնուամենայնիվ, քանի դեռ Եվրամիության հետ մերձեցմանն ուղղված բարեփոխումները և անդամակցության չափանիշներին համապատասխանությունը համատեղելի են Եվրասիական տնտեսական միության անդամակցության հետ, Հայաստանի Հանրապետությունը կմնա այս միության անդամ և կշարունակի զարգացնել առևտրատնտեսական հարաբերությունները դրա անդամ պետությունների հետ», – նշել է Հայաստանի Հանրապետության վարչապետը։