Հայաստանն իր պատրաստակամությունն է հայտնում Ադրբեջանի հետ ստեղծել և վերականգնել երկաթուղային հաղորդակցությունը,- այս մասին հայտարարել է Հայաստանի վարչապետ Նիկոլ Փաշինյանը։

Հայաստանի կառավարության ղեկավարի խոսքով՝ տրանսպորտային հաղորդակցության դերը կարևոր է տարածաշրջանային կայունության, անվտանգության և ընդհանրապես խաղաղության ապահովման գործում։

«Այսօր մենք շատ ենք քննարկում տարածաշրջանային հաղորդակցությունների բացման մասին, և ես կարծում եմ, որ շատ կարևոր է այստեղ նշել Հայաստանի պատրաստակամությունը՝ ձեռնարկելու շատ արդյունավետ և իրական քայլեր մեր տարածաշրջանում հաղորդակցությունները բացելու համար։ Հայաստանը պատրաստակամություն է հայտնում ստեղծել և վերականգնել Հայաստանի և Ադրբեջանի միջև երկաթուղային հաղորդակցությունը: Ընդ որում, երկու նախապես գոյություն ունեցող երկաթուղիների միջոցով։ Առաջինը Ադրբեջանի Ղազախը Հայաստանի Տավուշի մարզի հետ կապող հյուսիսային երթուղին է, երկրորդը՝ Ադրբեջանը Նախիջևանի հետ կապող հարավային երթուղին։ Մենք կարծում ենք, որ Ադրբեջանի արևմտյան շրջանները կարող են կապված լինել Նախիջևանի և արտաքին աշխարհի հետ նաև հյուսիսային ճանապարհով։ Այս պատրաստակամությունը մենք պաշտոնապես հայտնել ենք նաև այն մայրուղիների վերաբերյալ, որոնք կարող են ունենալ հյուսիսային, կենտրոնական և հարավային երթուղիներ, որոնք նոր հնարավորություններ կբացեն մեր տարածաշրջանի համար։ Ըստ էության, Հայաստանն աշխարհի խաչմերուկում կարող է միացնել այլ երկրներ Հյուսիս-Հարավ և Արևելք-Արևմուտք առանցքով: Միաժամանակ, նույն պատրաստակամությունն ենք հայտնում Հայաստան-Թուրքիա երկաթուղու բացման և Հայաստան-Թուրքիա երկու մայրուղիների վերակառուցման առումով, ինչը էական ազդեցություն կունենա ոչ միայն մեր տարածաշրջանի, այլև միջազգային տնտեսական հարաբերությունների վրա, մշակութային ու քաղաքական հարաբերությունները և ընդհանրապես գլոբալ անվտանգության խնդիրները»,- ասել է Նիկոլ Փաշինյանը։