Այն երկրները, որոնք Հայաստանի նկատմամբ անվտանգության պարտավորություններ ունեն, մեզ չօգնեցին, միայնակ թողեցին,- Եվրախորհրդարանում իր ելույթի ժամանակ ասաց ՀՀ վարչապետ Նիկոլ Փաշինյանը։

Նրա խոսքով, 44-ամյա պատերազմից հետո իշխող կուսակցությունը խորհրդարանում մեծամասնություն ուներ, սակայն սոցիալ-հոգեբանական ճգնաժամը հաղթահարելու համար նշանակվեցին արտահերթ խորհրդարանական ընտրություններ։

«Խորհրդարանի լուծարումից երկու օր անց՝ 2021 թվականի մայիսի 12-ին, ադրբեջանական ուժերը խախտեցին Հայաստանի սահմանը և ներխուժեցին Հայաստանի ինքնիշխան տարածք։ Այս իրավիճակում Հայաստանի անվտանգության համակարգը համարվող Հավաքական անվտանգության պայմանագրի կազմակերպությունը և Հայաստանի նկատմամբ անվտանգության պարտավորություններ ունեցող երկրները մեզ բոլորովին չօգնեցին, մեզ միայնակ թողեցին։ Այս սադրանքի նպատակն էր տապալել ծրագրված խորհրդարանական ընտրությունները և կաթվածահար անել Հայաստանի պետականությունը կամ ձևավորել արտաքին ուժերից կախված կառավարություն, սակայն նման պայմաններում հայ ժողովուրդը կարողացավ ամուր կանգնել ինքնիշխանության, անկախության և ժողովրդավարության պաշտպանության դիրքերում»,- ասաց Հայաստանի վարչապետը։

Նրա խոսքով, դրանք ընտրություններ էին, որոնք միջազգային մակարդակով գնահատվեցին ազատ, ժողովրդավարական, թափանցիկ և մրցակցային։ Ինչպես նշել է Փաշինյանը, Հայաստանի պատմության մեջ առաջին անգամ ընտրությունները դարձան ներքին ճգնաժամը հաղթահարելու միջոց, այլ ոչ թե հակառակը։

«Սակայն Հայաստանում ժողովրդավարությունը ստացել և շարունակում է ստանալ ուժեղ հարվածներ կրկնվող սցենարով՝ արտաքին ագրեսիա, հետո անվտանգության ոլորտում Հայաստանի դաշնակիցների անգործություն, հետո պատերազմ կամ հումանիտար իրավիճակ կամ անվտանգության արտաքին սպառնալիքներ, ժողովրդավարությունը և ինքնիշխանությունը տապալելու փորձեր, որը դրսևորվում է հիբրիդային տեխնոլոգիաներով, ներքին անկայունության հրահրմամբ և արտաքին ուժերով»,- ասաց Փաշինյանը։

Բացի այդ, ինչպես Եվրախորհրդարանի նախագահ Ռոբերտա Մեցոլայի հետ մամուլի ասուլիսում հայտարարեց Հայաստանի վարչապետը, Հայաստանը ակնկալում է Եվրամիությունից զգալի աջակցություն՝ հաղթահարելու մի շարք մարտահրավերներ, այդ թվում՝ մարդասիրական խնդիրները, որոնք առաջացել են Ղարաբաղից ավելի քան 100.000 տեղահանված հայերի պատճառով։