Վրաստանի ՆԳՆ տարբեր ստորաբաժանումների աշխատակիցների կողմից այս տարվա մարտի 7-ին և 8-ին խորհրդարանի հարակից տարածքում բողոքի ակցիայի ժամանակ ազատ են արձակվել Վարչական իրավախախտումների վերաբերյալ օրենսգրքի համաձայն բերման ենթարկված բոլոր անձինք: Այս մասին ասված է Վրաստանի ՆԳՆ հայտարարության մեջ։

«Ձերբակալվածների մի մասը ներկայացվել է դատարան, իսկ մնացածը ազատ են արձակվել մեկուսարանում գտնվելու ժամկետը լրանալու հիմքով։

Ներքին գործերի նախարարությունում շարունակվում է մարտի 7-8-ը տեղի ունեցած բռնի իրադարձությունների առնչությամբ հետաքննությունը Վրաստանի Քրեական օրենսգրքի 353-րդ և 187-րդ հոդվածներով։ Ձեռնարկվում են քննչական գործողություններ՝ խորհրդարանի շենքի հարակից տարածքում շարունակվող բողոքի ակցիայի ժամանակ ոստիկանների վրա հարձակում գործած անձանց և բռնի այլ գործողություններ կատարած անձանց հայտնաբերելու և ձերբակալելու ուղղությամբ»,- ասված է ՆԳՆ հաղորդագրությունում։