Հեռուստաընկերություններից մեկի տեղեկությունը, թե իբր ՆԳՆ-ն խախտել է «Ոստիկանության մասին» օրենքը՝ միաժամանակ ջրցան մեքենաներ և արցունքաբեր գազ կիրառելով, սուտ է և քաղաքացիներին միտումնավոր մոլորության մեջ գցելու փորձ,- այս մասին ասված է ՆԳՆ տարածած հաղորդագրության մեջ։

Գերատեսչությունը պարզաբանում է, որ ՆԳՆ-ն, կառավարելով բռնի հավաքներն ու ցույցերը, օգտագործում է հատուկ միջոցներ, որոնք լիովին համապատասխանում են եվրոպական չափանիշներին և ակտիվորեն օգտագործվում են եվրոպական մի շարք երկրների ոստիկանական ստորաբաժանումների կողմից։

«Հասարակության բարձր հետաքրքրությունից ելնելով` ցանկանում ենք արձագանքել լրատվամիջոցներից մեկի տարածած տեղեկատվությանը, որը վերաբերում էր այս տարի տեղի ունեցած բողոքի ակցիաների ժամանակ ՆԳՆ-ի կողմից հատուկ միջոցների ապօրինի օգտագործման փաստին։

Հանրությանը տեղեկացնելու նպատակով պարզաբանում ենք, որ սուտ է նշված հեռուստաընկերության կողմից նյութում տարածված այն տեղեկությունը, թե իբր նախարարությունը խախտել է «Ոստիկանության մասին» օրենքը՝ միաժամանակ կիրառելով ջրցան մեքենաներ և արցունքաբեր գազ եւ քաղաքացիներին միտումնավոր մոլորության մեջ գցելու փորձ։

Վրաստանի «Ոստիկանության մասին» օրենքը հստակ սահմանում է ոստիկանության կողմից հատուկ միջոցների կիրառման կանոնները, 33-րդ հոդվածի 3-րդ կետի համաձայն՝ «Արցունքաբեր գազի օգտագործումը թույլատրվում է անձի, ոստիկանի վրա հարձակումը հետ մղելու համար և/կամ պահպանվող օբյեկտում՝ օրենքի և կարգի զանգվածային և խմբակային խախտումը կանխելու համար։ Իսկ «ջրային թնդանոթ» մեքենան օգտագործվում է օրենքի և կարգի զանգվածային խախտումը կանխելու, պետության վրա խմբակային հարձակումը հետ մղելու և/կամ հանրային օբյեկտի պաշտպանության համար։

Ոստիկանության կողմից կիրառվող հատուկ միջոցների տեսակը և դրա ինտենսիվությունը որոշվում են ըստ կոնկրետ իրավիճակի՝ օրենքով սահմանված կարգով։

Ընդգծում ենք, որ ոչ «Ոստիկանության մասին» Վրաստանի օրենքը, ոչ էլ դրա հիման վրա ընդունված որևէ վավեր իրավական ակտ չի արգելում միաժամանակ կամ զուգահեռ ռեժիմով ջրային շիթերի և արցունքաբեր գազի օգտագործումը։

Ավելին, այնպիսի հեղինակավոր միջազգային կազմակերպությունների առաջարկությունները, ինչպիսիք են ԵԱՀԿ/ԺՀՄԻԳ-ը և «Amnesty International»-ի ուղեցույց փաստաթղթերը, չեն նախատեսում նման արգելք։

Համաձայն Amnesty International-ի ուղեցույցի փաստաթղթի՝ թույլատրվում է մարկերային ներկ և/կամ քիմիական նյութեր խառնել ջրցան մեքենաների մեջ, իսկ ԵԱՀԿ/ԺՀՄԻԳ-ի ուղեցույցների համաձայն՝ թույլատրելի է արցունքաբեր գազ ավելացնել ջրցան մեքենայի մեջ և օգտագործել դրանք ներգրավված անձանց դեմ։ Նույն փաստաթղթի համաձայն՝ արցունքաբեր գազի կիրառման միակ նպատակը պետք է լինի հավաքը ցրելը և այն չպետք է օգտագործվի այնպիսի վայրում, որտեղ մարդիկ հնարավորություն չեն ունենա լքելու վայրը։

Եվս մեկ անգամ նշում ենք, որ ՆԳՆ-ն, կառավարելով բռնի հավաքներն ու ցույցերը, օգտագործում է հատուկ միջոցներ, որոնք լիովին համապատասխանում են եվրոպական չափանիշներին և ակտիվորեն օգտագործվում են մի շարք եվրոպական երկրների ոստիկանական ստորաբաժանումների կողմից։

Կեղծ տեղեկատվության տարածումն ուղղված է հանրությանը մոլորեցնելու և ՆԳՆ-ն միտումնավոր վարկաբեկելուն»,- ասված է ՆԳՆ հայտարարության մեջ։