Վրաստանի ՆԳՆ-ի, գլխավոր դատախազության և ֆինանսների նախարարության աշխատակիցները համատեղ ձեռնարկված օպերատիվ և քննչական համալիր գործողությունների արդյունքում Իրանի քաղաքացի՝ 1961 թվականին ծնված Բ.Տ.-ին ձերբակալել են առանձնապես խոշոր չափերով թմրամիջոցներ Վրաստան ապօրինի ներկրման և գնման և պահպանման մեղադրանքով։

«ՄԱԿ-ի Թմրամիջոցների և հանցավորության դեմ պայքարի գրասենյակի և Համաշխարհային մաքսային կազմակերպության՝ կոնտեյներների վերահսկման ծրագրի շրջանակներում, իրավապահները Փոթի նավահանգստում հայտնաբերել են մեղադրյալի վարած վտանգավոր բեռնատարը։ Մեքենայի խուզարկությամբ՝ կցասայլի հետևի երկու դռներից որպես ապացույց հանվել է մինչև 80 կիլոգրամ «Հերոին» թմրամիջոցի 315 փաթեթ։

Քննությամբ պարզվել է, որ մեղադրյալը՝ Իրանի Իսլամական Հանրապետության քաղաքացին, մտադիր է եղել Իրանից Հայաստանի և Վրաստանի տարածքով առանձնապես խոշոր չափի թմրամիջոց տեղափոխել Եվրոպա, այն փորձել է Վրաստանի ծովային նավահանգիստներից մեկով, երբ ձերբակալվել է»,- հայտնել են ՆԳՆ-ից։

Հետաքննությունն անցկացվում է Վրաստանի Քրեական օրենսգրքի 260-րդ և 262-րդ հոդվածներով։ Հանցագործությունը պատժվում է մինչև 20 տարի ժամկետով կամ ցմահ ազատազրկմամբ։

«Ինչպես գիտեք, ՆԳՆ-ն ակտիվորեն համագործակցում է գործընկեր երկրների հետ անդրազգային և կազմակերպված հանցավորության դեմ պայքարում, ինչի վառ օրինակն է անցած ամիս բելգիացի և հոլանդացի գործընկերների հետ անցկացված համատեղ ոստիկանական միջոցառումը, որի շրջանակներում, մեր կողմից տրամադրված տեղեկատվության հիման վրա Բելգիայի Թագավորությունում, մասնավորապես՝ Անտվերպեն նավահանգստում, երկու փուլով առգրավվել է աննախադեպ քանակությամբ՝ մեկ տոննա 660 կիլոգրամ «Հերոին» թմրամիջոց», – հայտնում է ՆԳՆ-ն։