Վրաստանի ՆԳՆ-ն հայտարարություն է տարածել.

Գերատեսչության հաղորդմամբ, ՆԳՆ աշխատակիցները, օրինականությունն ու կարգը պաշտպանելու նպատակով, մոբիլիզացված են Վրաստանի տարբեր քաղաքներում անցկացվող ակցիաների շրջակայքում։

Ըստ ՆԳՆ-ի՝ Խորհրդարանի հարևանությամբ՝ Ռուսթավելի պողոտայում ցուցարարների հավաքի ժամանակ արդեն գրանցվել են բողոքի ապօրինի արտահայտման դեպքեր։

«Ամբոխի մի մասը վնասում է գետնի ենթակառուցվածքը, նաև հանրահավաքի մասնակիցներն իրենց հետ ունեն տարբեր վտանգավոր իրեր, որոնք կարող են օգտագործվել բռնի գործողությունների համար, ինչպես նախորդ օրերին։

Վրաստանի օրենսդրությունը պաշտպանում է հավաքների, ցույցերի և արտահայտվելու իրավունքը, ինչպես նաև սահմանում է բողոքի ձևերը՝ հասարակական կարգն ու անվտանգությունը պաշտպանելու համար։

Հանրահավաքի մասնակիցներին, որոնց գործողությունները դուրս են օրենքով թույլատրված բողոքի ձևերից, զգուշացնում ենք դադարեցնել անօրինական գործողությունները, բողոքել օրենքով թույլատրված սահմաններում, հակառակ դեպքում ՆԳՆ-ն կձեռնարկի օրենքով նախատեսված համապատասխան միջոցներ։ «Յուրաքանչյուր ապօրինի գործողության կհետևի ոստիկանության համապատասխան իրավական արձագանքը»,- ասված է ՆԳՆ տեղեկատվության մեջ։