ՆԳ նախարարության Թբիլիսիի ոստիկանության վարչության աշխատակիցները, օպերատիվ-հետախուզական միջոցառումների և քննչական գործողությունների արդյունքում, Թբիլիսիում տեղի ունեցած սպանության գործով բերման են ենթարկել երեք անձի։ Տեղեկությունը տարածում է ՆԳ նախարարությունը։

Գերատեսչության տվյալներով՝ 1995 թվականին ծնված Կ.Մ.-ն ձերբակալվել է բռնություն կազմակերպելու, հատկապես ծանր հանցագործությունը կոծկելու և առանձնապես ծանր հանցագործության մասին չհայտնելու համար, իսկ 1996 թվականին ծնված Գ.Մ.-ն և 2004 թվականին ծնված Շ.Չ.-ն ձերբակալվել են առանձնապես ծանր հանցագործության մասին չհաղորդելու համար։ Հանցագործությունները նախատեսում են առավելագույնը 6-ից 15 տարվա ազատազրկում։

«Քննությամբ պարզվել է, որ մեղադրյալներից մեկը՝ Կ.Մ.-ի ազգականը, տարաձայնություն է ունեցել 1993 թվականին ծնված Կ.Մ.-ի հետ։ Ընթացիկ տարվա հունիսի 17-ին ամբաստանյալ Կ.Մ.-ն նշված ազգականի նկատմամբ ֆիզիկական հաշվեհարդար տեսնելու նպատակով հանդիպել է իր ընկերների՝ Գ.Մ.-ի, Շ.Չ.-ի և Դ.Մ.-ի հետ։ Նախապես կազմված ծրագրով հանցակիցներին հանձնել է մահակներ, շնչադիմակներ, բաճկոններ և մեղադրյալներից մեկին պատկանող ավտոմեքենայով վարել Կ.Մ.-ի բնակելի շենքին հարակից տարածք։ Քննությամբ պարզվել է նաև, որ Դ.Մ.-ն սառը զենքով դանակով հարվածել է 1993 թվականին ծնված Կ.Մ.-ի կրծքավանդակին, որից հետո վիրավոր Կ.Մ.-ն հրազենից կրակել է Դ.Մ.-ին և վիրավորել նրան: Ստացված վերքերի հետևանքով Կ.Մ.-ն Հիվանդանոց տեղափոխվելուց անմիջապես հետո մահացել է։ Ինչ վերաբերում է սպանության մեջ բացահայտված Դ.Մ.-ին, ապա նա դեռ հիվանդանոցում է, որտեղ շարունակում է բուժումը իրավապահների հսկողության ներքո։

Հանցագործության մեջ մեղադրվող երեք անձինք էլ իրավապահները ձերբակալել են դեպքից մի քանի ժամվա ընթացքում՝ թեժ հետապնդման արդյունքում։ Ոստիկանները որպես ապացույց առգրավել են զենքերը՝ դանակ, մահակ և հրազեն։

Կանխամտածված սպանության, խմբակային բռնության կազմակերպման, առանձնապես ծանր հանցանքը կոծկելու և առանձնապես ծանր հանցանքի մասին չհաղորդելու փաստերով հետաքննությունն ընթանում է Վրաստանի ՔՕ 108, 225, 375 և 376 հոդվածներով»,- հայտնել են ՆԳ նախարարությունից։