Վրաստանի ներքին գործերի նախարար Սուլխան Թամազաշվիլին, պարեկային ոստիկանության դեպարտամենտի տնօրեն Լևան Մաիսուրաձեի հետ միասին, այցելել է Թբիլիսիում, Չուղուրեթի շրջանում տեղի ունեցած հարձակման ժամանակ վիրավորված պարեկային տեսուչ, ոստիկանության մայոր Մերաբ Քավթարաձեին։

ՆԳՆ-ի հաղորդմամբ՝ նախարարը բժիշկներից տեղեկություններ է ստացել նրա առողջական վիճակի մասին, վիրավոր ոստիկանին մաղթել է արագ ապաքինում և շնորհակալություն հայտնել ցուցաբերած քաջության համար։

«Պարեկային տեսուչի վրա պարեկային ծառայության ժամանակ հարձակվել է դանակով զինված տղամարդ։ Մերաբ Քավթարաձեն և ոստիկանության մայոր Գիորգի Ձաձամիան նկատել են մի տղամարդու, որը վիրավորել էր մեկին և դանակով հետապնդում էր նրան։ Իրավապահ մարմինների աշխատակիցները կոչ են արել տղամարդուն կանգ առնել, սակայն նա չի ենթարկվել նրանց խնդրանքին և հարձակվել է նրա վրա դանակով։ Պարեկային տեսուչները տղամարդուն ձերբակալել են որպես կասկածյալ», – նշվում է գերատեսչության տեղեկատվության մեջ։