2022 թվականի համար «Շահ Դենիզ» գազատարը կտեղափոխի 20 միլիարդ խորանարդ մետր գազ, ինչը բավականին բարձր ցուցանիշ է, քանի որ այս խողովակաշարի առավելագույն բեռնվածությունը մինչ այժմ հասել է 22 միլիարդ խորանարդ մետրի։ Հետևաբար, Վրաստանը, որպես տարանցիկ երկիր, հաջորդ տարի ադրբեջանական գազի տարանցումից էլ ավելի էժան բնական գազ կստանա։ Այս մասին Վրաստանի առաջին ալիքին հայտնել են Վրաստանի նավթի և գազի կորպորացիայից։

Օրինակ, եթե այս տարի Վրաստանն ընդհանուր առմամբ ստացել է 1,014 միլիարդ խորանարդ մետր գազ, ապա 2022 թվականին այդ ցուցանիշը կհասնի 1500 խմ-ի։

Ինչպես հայտնի է, Վրաստանը որոշակի արտոնություններ է ստանում ադրբեջանական գազի դիմաց։ Ներկայում Վրաստանի և Ադրբեջանի միջև գործում են երկու տեսակի պայմանագրեր՝ կամընտիր գազի և լրացուցիչ գազի: Կամընտիր գազային պայմանագիրը Վրաստանին թույլ է տալիս տարեկան ցածր գնով գնել Հարավկովկասյան գազատարի բնական գազի 5%-ը։ Այս պայմանագիրն ուժի մեջ է մինչև 2066 թվականը։ Հավելյալ գազի առքուվաճառքի պայմանագրի ժամկետը լրանում է 2026 թվականին, մինչ այդ մեր երկիրը տարեկան 500 մլն. խմ. գազ կստանա զեղչված գնով։

2024-2025 թվականներին նախատեսվում է «Հարավային միջանցք» գազատարի թողունակությունը հասցնել 30 միլիարդ խորանարդ մետրի, ինչը նշանակում է, որ տարանցման դիմաց Վրաստանում կավելանան նաև էժան գազի ծավալները։

Հարավային գազային միջանցքի 3500 կմ. երկարությամբ խողովակաշարը սկիզբ է առնում Սանգաչալի տերմինալից, իսկ վերջնական նպատակակետը Իտալիան է։ Մինչ այդ, սակայն, ադրբեջանական գազը պետք է անցնի Վրաստանի, Թուրքիայի, Հունաստանի և Ալբանիայի տարածքները, ինչպես նաև Ադրիատիկ ծովը։ Իտալիայից ադրբեջանական գազը կբաշխվի եվրոպական մի քանի այլ երկրներ։ Ինչ վերաբերում է Վրաստանին, ապա Հարավային գազային միջանցքում մեր երկրի՝ որպես տարանցիկ երկրի դերը բավական կարևոր է։