Լայնածավալ պատերազմի սկզբից ի վեր առաջին անգամ Ուկրաինա է ժամանել ՆԱՏՕ-ի ռազմական կոմիտեի նախագահ Ռոբ Բաուերը։ Դաշինքի բարձրաստիճան զինվորականը մասնակցում է Կիևի անվտանգության համաժողովին։

«Իմ այցը, որը ՆԱՏՕ-ի առաջին ռազմական պատվիրակությունն է Ուկրաինա լայնածավալ միջամտությունից հետո, ապացույցն է այն բանի, որ ՆԱՏՕ-ն և Ուկրաինան ավելի մոտ են, քան երբևէ»,- ասել է Բաուերը։

ՆԱՏՕ-ի ռազմական կոմիտեի նախագահի խոսքով, ինքը խորը հարգանքով է վերաբերվում ուկրաինացիների խիզախությանն ու ուժին, որը նրանք ցուցաբերել են ինչպես մարտի դաշտում, այնպես էլ դրանից դուրս։

«Օրեցօր ավելի ենք մտերմանում, ավելի համատեղելի։ Մենք ամեն ինչ անում ենք միասին, որպեսզի Ուկրաինան դառնա մեր դաշինքի անդամ: Շվեդիայի դրոշը չի լինի միակ կապույտ-դեղին դրոշը ՆԱՏՕ-ի կենտրոնակայանում»,- ասել է Ռոբ Բաուերը։

Բացի այդ, ելույթ ունենալով Կիևի անվտանգության ֆորումում, ՆԱՏՕ-ի բարձրաստիճան զինվորականը կոչ է արել շարունակել աջակցությունը Կիևին: Բաուերի կարծիքով՝ հոռետեսները պատերազմներում չեն հաղթում:

«Եթե 2023-ին աշխարհը միգուցե չափազանց լավատես էր, մենք չպետք է նույն սխալը թույլ տանք և 2024-ին չափազանց հոռետես չլինենք»,- նշել է նա։

Ըստ Ռոբ Բաուերի՝ հաշվի առնելով փաստերը, բոլոր հիմքերը կան վստահ լինելու Ուկրաինայի հաջողության հասնելու ունակության մեջ։

«Ձեզ միայն մեր օգնությունն է պետք։ ՆԱՏՕ-ի անդամ երկրները և աշխարհի շատ այլ երկրներ աննախադեպ օգնություն են ցուցաբերում Ուկրաինային, և դա իսկապես փոխեց իրավիճակը դեպի լավը, թեև Ուկրաինան ավելի մեծ աջակցության կարիք ունի»,- ասել է դաշինքի ռազմական կոմիտեի նախագահը։