Էկոնոմիկայի և կայուն զարգացման նախարար Նաթիա Թուրնավան Դուբայում «Expo 2020»-ի շրջանակներում վրացական պատվիրակության անդամների հետ հանդիպում է ունեցել լոգիստիկայի և տրանսպորտի ոլորտում աշխատող DP World ընկերության հետ։ Նաթիա Թուրնավայի խոսքով՝ հանդիպմանը քննարկվել է Վրաստանի՝ որպես տարածաշրջանային առաջատարի ներուժը՝ լոգիստիկ զարգացման առումով, ինչպես նաև կոնկրետ նախագծերի, այդ թվում՝ Անակլիա խորջրյա նավահանգստի վրա։ Հանդիպմանը մասնակցել է վրացական պատվիրակության ղեկավար, փոխվարչապետ, շրջակա միջավայրի և գյուղատնտեսության նախարար Լևան Դավիթաշվիլին։

«DP World-ը տերմինալ-նավահանգստային ծառայությունների, բեռնափոխադրումների և լոգիստիկայի առումով աշխարհի առաջատար ընկերություններից է։ Մենք նրանց ծանոթացրինք Վրաստանում լոգիստիկ ենթակառուցվածքների զարգացմանը, ինչպես նաև խոսեցինք Անակլիա խորջրյա նավահանգստի մասին։ «DP World»-ը շատ լավ գիտի մեր սևծովյան ափը, գիտի այն ներուժը, որ ունի Վրաստանը տարածաշրջանում՝ որպես միջանցքի շատ կարևոր մաս, որպես լոգիստիկ հարթակ»,- ասել է էկոնոմիկայի նախարարը։

Նաթիա Թուրնավայի խոսքով, վրացական կողմի հետ հանդիպման ժամանակ ընկերության ներկայացուցիչները ցանկություն են հայտնել մանրամասն ծանոթանալ Անակլիայի վերաբերյալ Վրաստանի կառավարության կատարած հետազոտությանը, ըստ որի Անակլիա խորջրյա նավահանգստի նախագիծը դեռևս պահպանում է բիզնեսի բարձր գրավչությունը։

Էկոնոմիկայի նախարարության տվյալներով՝ DP World-ը գլոբալ, կոնտեյներ-տերմինալային օպերատոր է, որն ունի բարձր հեղինակություն։ Այն շահագործում է 82 ծովային տերմինալ աշխարհի 40 երկրներում՝ տարեկան միջինը 70 միլիոն կոնտեյներ վարելով: Ընկերությունը տրամադրում է նաև լոգիստիկ և ծովային ծառայություններ և շահագործում է ազատ արդյունաբերական գոտիներ։ 2018 թվականի դրությամբ ընկերության եկամուտը կազմել է 8,5 միլիարդ դոլար:

«Մենք հուսով ենք, որ այս ընկերությունը, ինչպես նաև այլ պոտենցիալ ներդրողները շահագրգռված կլինեն մուտք գործել Անակլիա»,- ասել է Թուրնավան։