Վրաստանի արտաքին գործերի նախարարի առաջին տեղակալ Լաշա Դարսալիան հանդիպել է ԱՄՆ-ի Պետդեպարտամենտի կովկասյան բանակցությունների գծով ավագ խորհրդականի և Ժնևի միջազգային բանակցություններում ԱՄՆ-ի պատվիրակության ղեկավար, Ֆիլիպ Ռիկերի հետ։

Արտաքին գործերի նախարարության տեղեկատվության համաձայն՝ նախարարի առաջին տեղակալը շնորհավորել է Ֆիլիպ Ռիկերին նշանակման կապակցությամբ և նշել, որ նման փորձառու դիվանագետի նշանակումն այս պաշտոնում ԱՄՆ-ի բարձր հետաքրքրության արտահայտությունն է Վրաստանի միջազգային բանակցությունների նկատմամբ։

Իր հերթին Ֆիլիպ Ռիկերը հաստատել է ԱՄՆ-ի անսասան աջակցությունը Վրաստանի ինքնիշխանությանն ու տարածքային ամբողջականությանը։

«Հանդիպմանը կողմերը քննարկել են ռուս-վրացական հակամարտության խաղաղ կարգավորմանն առնչվող հարցերի լայն շրջանակ։ Այս գործընթացում նշվել է Ռուսաստանի կողմից Եվրամիության միջնորդությամբ կնքված 2008 թվականի օգոստոսի 12-ի զինադադարի համաձայնագրի կատարման անհրաժեշտությունը և Ժնևում միջազգային բանակցությունների արդյունավետ օգտագործման կարևորությունը։ Իրենց զրույցի ընթացքում Լաշա Դարսալիան և Ֆիլիպ Ռիկերը ուշադրություն են հրավիրել Վրաստանի օկուպացված տարածքներում անվտանգության, հումանիտար և մարդու իրավունքների առումով ստեղծված ծանր իրավիճակի վրա։ Կողմերը խոսել են նաև տարածաշրջանային անվտանգության խնդիրների մասին։

Ընդգծվել է Ռուսաստանի և Վրաստանի միջև հակամարտության խաղաղ կարգավորման գործընթացում ԱՄՆ-ի ակտիվ ներգրավվածության կարևորությունը։

Հանդիպմանը ևս մեկ անգամ նշվել է ԱՄՆ-ի և Վրաստանի միջև ամուր ռազմավարական գործընկերությունը։ Կողմերը պայմանավորվել են շարունակել սերտ համագործակցությունը տարածաշրջանում հակամարտությունների կարգավորման և անվտանգության ամրապնդման ուղղությամբ»,- ասված է ԱԳՆ-ի հաղորդագրության մեջ։