Մյունխենի անվտանգության համաժողովի նախագահ Վոլֆգանգ Իշինգերը հայտարարել է, որ Եվրոպայի անվտանգությունն այս պահին ապահովված է Ուկրաինայի շնորհիվ։

«Եվրոպան անվտանգ է, քանի որ ուկրաինացիները տարիներ շարունակ հաջողությամբ կանգնեցրել են հզոր ռուսական բանակը՝ իրենց երկրի պաշտպանության համար մղվող անհավատալիորեն երկարատև պայքարում», – ասել է Իշինգերը։

Նրա խոսքով՝ իրական մարտահրավերները կսկսվեն պատերազմի ավարտից հետո։ Ինչպես նշել է Իշինգերը, պատերազմի ավարտը չի երաշխավորի խաղաղություն Եվրոպայում։

«Երբ պատերազմը ավարտվի և զենքը լռի, Ռուսաստանը ժամանակ կունենա վերախմբավորման։ Հիմա հենց ուկրաինացիներն են կրում այդ բեռը։ Իսկ երբ պատերազմն ավարտվի, մենք՝ եվրոպացիներս, պետք է ստանձնենք այդ բեռի շատ ավելի մեծ բաժինը», – նշել է նա։

Մյունխենի անվտանգության համաժողովի նախագահը նաև հայտարարել է, որ ԱՄՆ-ի նոր անվտանգության ռազմավարությունը գաղափարական մարտահրավեր է Եվրոպայի համար։