Թբիլիսիի քաղաքային դատարանը բավարարել է Վրաստանի ազգային մրցակցության գործակալության միջնորդությունը «USA2GEORGIA»-ի գործով։ Մասնավորապես, ըստ գործակալության, մինչև վերջնական որոշման կայացումը, յուրաքանչյուր հաճախորդ պաշտպանված է ծանրոց(ներ)ի սեփականության իրավունքը կորցնելուց։

«Գործակալության կողմից ձեռնարկված գործողությունների արդյունքում, եթե հաճախորդը 30 օրվա ընթացքում չվճարի Վրաստանի պահեստում պահման ծախսերը և չհանի ծանրոցը, ապա ավտոմատ կերպով չի կորցնի դրա նկատմամբ սեփականության իրավունքը։

Ինչ վերաբերում է «USA2GEORGIA»-ի կողմից սպառողների իրավունքների մասին Վրաստանի օրենքի հնարավոր խախտմանը, ապա մինչև գործակալության վերջնական որոշումը ընկերությանն արգելվել է օտարել ծանրոցում գտնվող ապրանքները կամ թողնել իր տնօրինության տակ»,- ասված է մրցակցային գործակալության հաղորդագրության մեջ։

Ազգային մրցակցության գործակալությունը նշում է, որ գերատեսչությունը գործի վերաբերյալ վերջնական որոշումը կհրապարակի մինչև 2023 թվականի հունվարի վերջ։

«Հունվարի 16-ի դրությամբ, գործակալությունը ստացել է 107 դիմում, ուսումնասիրվում է 58 դեպք։ Սպառողի օգտին պայմանական պարտավորություն է կնքվել 9 առևտրականի հետ, ինչը նշանակում է, որ վաճառողը պարտավորվել է փոխել գործունեության ներքին քաղաքականությունը և վերականգնել այն սպառողների իրավունքները, ովքեր վնասվել են նախկինում իր առևտրային քաղաքականության հետևանքով», – հայտնել է գործակալությունը։

Ազգային մրցակցության գործակալությունը սկսել է հետաքննել անցյալ տարվա դեկտեմբերին USA2GEORGIA-ի կողմից սպառողների իրավունքների հնարավոր խախտման դեպքը։