Վրաստանի ազգային մրցակցության գործակալությունը «Էլ.տոմսեր» ՍՊԸ-ի բողոքի հիման վրա սկսել է հինգ տնտեսվարողների նկատմամբ ուսումնասիրության գործընթացը։

Գործակալության տվյալներով՝ խոսքը վերաբերում է կինոթատրոնի տոմսերի առցանց վաճառքի շուկայում ենթադրյալ հակամրցակցային գործողություններին։

Նրանց տեղեկություններով՝ հետաքննությունը սկսվել է երկու ուղղությամբ՝ գերիշխող դիրքի հնարավոր չարաշահումը («Մրցակցության մասին» օրենքի 6-րդ հոդված) և մրցակցության հնարավոր սահմանափակող պայմանագրերը, «կարտելային գործարքները» («Մրցակցության մասին» օրենքի 7-րդ հոդված):

Գործակալության տվյալներով՝ գերիշխող դիրքի ենթադրյալ չարաշահման փաստով հետաքննություն է սկսվել մեկ տնտեսվարողի նկատմամբ, իսկ հինգ տնտեսվարողների նկատմամբ՝ մրցակցությունը սահմանափակող համաձայնագրի ենթադրյալ խախտման փաստով։

«Տեղեկատվության համար. Գործակալությունը համապատասխան որոշում է կայացնում ոչ ուշ, քան գործի քննությունն սկսելուց վեց ամիս հետո։ Հաշվի առնելով հարցի կարևորությունն ու բարդությունը՝ հետաքննության գործընթացը կարող է տևել մինչև 18 ամիս։ Ազգային մրցակցության գործակալությունը ներկայումս քննարկում է չորս հետաքննության գործեր՝ համաձայնեցված գործողությունների, գերիշխող դիրքի չարաշահման, անբարեխիղճ մրցակցության և վարչական մարմնի կողմից մրցակցության սահմանափակման ենթադրյալ դեպքեր»,- ասված է մրցակցային գործակալության տեղեկատվության մեջ։