Աշխատանքային այցով Մյունխենում գտնվող Թբիլիսիի քաղաքապետ Կախա Կալաձեն պատգամավոր Իրակլի Բենդելիանիի և «Թեգետա Մոթորս» ընկերության ղեկավարների հետ այսօր Մյունխենում հանդիպել է MAN ընկերության ներկայացուցիչների հետ և ստուգել Թբիլիսիի համար նախատեսված 18 մետրանոց ավտոբուսները։

Թբիլիսիի քաղաքապետին հյուրընկալել է MAN-ի փոխնախագահ Բարբարոս Օկտեյմը։

Թբիլիսիի քաղաքապետ Կախա Կալաձեի խոսքով՝ ավտոբուսների ներկրումը կսկսվի դեկտեմբերից։

«Այսօր մենք Մյունխենում ենք, որտեղ տեսանք 18 մետրանոց ավտոբուսներ, որոնք նախատեսված էին Թբիլիսիի համար։ Մենք գնել ենք 160 միավոր ավտոբուս։ Շատ կարևոր է հասարակական տրանսպորտի զարգացումն ու խթանումը։ Մայրաքաղաքի կառավարությունն ամեն ինչ անում է, որպեսզի հասարակական տրանսպորտը հասանելի լինի բոլորին, և մարդիկ կարողանան ազատ տեղաշարժվել։ Այսօր մենք ունենք որոշ մարտահրավերներ. մենք տեսնում ենք գերբեռնված ավտոբուսներ: 18 մետրանոց ավտոբուսները մեզ թույլ կտան բեռնաթափել ու տեղափոխել ավելի շատ ուղեւորներ։ Վերջին երեք տարիներին մենք ամբողջությամբ թարմացրել ենք հասարակական տրանսպորտը՝ քաղաքն ունի նոր ավտոբուսներ և միկրոավտոբուսներ։ Վերջին փուլը 18 մետրանոց ավտոբուսների ներդրումն էր, որը կավարտվի հաջորդ տարվա վերջին։ Այս տարի դեկտեմբերին Վրաստան կժամանի 50 միավոր, որոնք հունվարի վերջից կսպասարկեն Թբիլիսիի բնակչությանը։ Այս ավտոբուսները տեսողականորեն գրավիչ կլինեն քաղաքի համար, և կլինեն կարևոր բաղադրիչ՝ ուղեւորափոխադրումների առումով»,- ասել է Կախա Կալաձեն։

MAN ընկերության պաշտոնական ներկայացուցիչը Վրաստանում «Թեգետա Մոթորս» ընկերությունն է, որը համագործակցելով MAN ընկերության հետ, մատուցում է ավտոբուսների շարունակական սպասարկում բարձրորակ օրիգինալ ավտոպահեստամասերով և վերանորոգման ծառայություններ։

«Մենք ուրախ ենք, որ այս նախագծի շրջանակներում Թբիլիսիի բնակչությունը կստանա MAN ապրանքանիշի ավտոբուսներ։ Դա մի կողմից կլինի ամենահարմարավետը, իսկ մյուս կողմից հաշվի է առնվում շրջակա միջավայրի նկատմամբ հոգատարությունը։ Այս նախագծի շրջանակներում մենք պարտավորվում ենք սպասարկել Թբիլիսին՝ սկսած ավտոբուսների մատակարարումից, վերջացրած ավտոբուսների պատշաճ շահագործմամբ։ Նախագիծը, մասնավորապես, նախատեսում է թրեյնինգներ, Վրաստանում գերմանական ստանդարտների ներդրում և ժամանակակից տեխնոլոգիաներով ավտոկայանատեղիի կազմակերպում»,- ասաց «Թեգետա» հոլդինգի բիզնեսի զարգացման տնօրեն Իրակլի Պապիաշվիլին։

Նոր ավտոբուսները նախատեսված են 162 ուղեւորի համար, այդ թվում՝ 43 նստատեղ։ Ավտոբուսները լիովին հարմարեցված են հաշմանդամների համար. տնակում հատուկ տեղ է հատկացված անվասայլակի անվտանգ տեղադրման համար, ունի նաև բեռնման թեքահարթակ։ Տրանսպորտը հագեցած է ժամանակակից ստանդարտով, ինտեգրված ջեռուցման, օդորակման և օդափոխության համակարգով, որը նախատեսված է Թբիլիսիի բնակլիմայական պայմանների համար։

Ավտոբուսները հագեցված են ձայնային տեղեկատվական համակարգով, ներքին և արտաքին հակավանդալային տեսադիտարկման համակարգով, բջջային հեռախոսների լիցքավորման կետերով և ժամանակակից մոնիտորինգի, կառավարման և անվտանգության համակարգերով։

Տրանսպորտում գործում է տեղեկատվական համակարգ, որը ներառում է ուղևորավճարների վճարման և տեղեկատվական համակարգերի կառավարման համակարգիչ, տեղեկատվական վահանակներ, աուդիո, տեղեկատվական և վիդեո մոնիտորինգի համակարգ, ինչպես նաև WIFI սարք։

«Ուրախ ենք Մյունխենում հյուրընկալելու Թբիլիսիի քաղաքապետարանի և «Թեգետա Մոթորս»-ի մեր գործընկերներին։ Թբիլիսիի կողմից գնված 160 միավորից մենք ստուգեցինք առաջին ավտոբուսը։ Սա առաջին նախագիծը չէ, որ մենք իրականացնում ենք նրանց հետ միասին։ Մենք նաև անհամբեր սպասում ենք տրանսպորտային նախագծերին և հուսով ենք, որ մինչև տարեվերջ կտեսնենք ավտոբուսների մի մասը Թբիլիսիի փողոցներում»,- ասել է Մերձավոր Արևելքում MAN-ի վաճառքի մենեջեր Բուրա Ջեյհանը։

Նախատեսվում է Թբիլիսիի քաղաքապետարանի կողմից գնված բնական գազով աշխատող 160 միավոր ավտոբուսներ փուլ առ փուլ ներդնել Թբիլիսի։ Մինչեւ 2024 թվականի վերջ MAN ընկերության արտադրած շուրջ 400 ավտոբուսներ կառաքվեն Թբիլիսի, ինչը կկազմի ընդհանուր ավտոբուսային պարկի մոտ 40%-ը։

Տեղեկությունը հայտնում է մայրաքաղաքի քաղաքապետարանը։