Վրաստանի առողջապահության նախարար Միխեիլ Սարջվելաձեն հանդիպել է իր հայ գործընկեր Անահիտ Ավանեսյանի հետ։
Առողջապահության նախարարության մամուլի ծառայությունից հայտնում են, որ կողմերը քննարկել են առողջապահության ոլորտում համատեղ ծրագրերը և պայմանավորվել համագործակցության հետագա խորացման հարցերը։ Զրույցն անդրադարձել է Հայաստանում և Վրաստանում առողջապահության ոլորտում ընթացիկ և նախատեսվող բարեփոխումներին և այս ուղղությամբ փորձի փոխանակման կարևորությանը։
«Միխեիլ Սարջվելաձեն պատվիրակության անդամներին տեղեկացրել է առողջապահական ծառայությունների հասանելիության բարելավման առումով զգալի առաջընթացի մասին։ Նախարարը նշել է, որ երկրների միջև փորձի փոխանակումը կնպաստի հիվանդներին ուղղված համակարգի հետագա զարգացմանը»,- նշված է առողջապահության նախարարության հաղորդագրության մեջ։
Հայաստանի առողջապահության նախարարի Վրաստան այցին նախորդել է Ժնևում Առողջապահության համաշխարհային ասամբլեայի շրջանակներում Միխեիլ Սարջվելաձեի և Անահիտ Ավանեսյանի հանդիպումը, որտեղ քննարկվել են էլ ավելի սերտ գործընկերության հեռանկարները։
Նախարարությունում կայացած հանդիպմանը ներկա էին փոխնախարարներ Թամար Գաբունիան և Թեա Գիորգաձեն, ինչպես նաև Վրաստանում Հայաստանի արտակարգ և լիազոր դեսպան Աշոտ Սմբատյանը։
Հայաստանի առողջապահության նախարարի հետ այցով Վրաստանում են` Հայաստանի հիվանդությունների վերահսկման և կանխարգելման ազգային կենտրոնի գլխավոր տնօրեն Ստեփան Աթոյանը, Ուռուցքաբանության ազգային կենտրոնի տնօրեն Նարեկ Մանուկյանը, Դեղերի և բժշկական տեխնոլոգիաների փորձագիտական կենտրոնի ղեկավար Արայիկ Բաղրյանը, նախարարության միջազգային կապերի վարչության պետ Արմեն Մելքոնյանը և պատվիրակության այլ անդամներ։