«Շատ լավ գիտեն, որ վարկի թեման հիմնականում բլեֆ է, այն իրականացնելը դժվար կլինի», – այս մասին հայտարարել է Վրաստանի նախագահ Միխեիլ Ղավելաշվիլին՝ պատասխանելով լրագրողների հարցին։

Մասնավորապես, Ղավելաշվիլին հարցի էր պատասխանել Եվրոպական խորհրդի գագաթնաժողովի որոշման վերաբերյալ, ըստ որի՝ փոխարենը, որ օգտագործվեն Ռուսաստանի սառեցված ակտիվները, ԵՄ ղեկավարները համաձայնության են եկել Ուկրաինային համատեղ վարկ տրամադրելու շուրջ։

«Չհաջողվեց համաձայնության գալ սառեցված ակտիվների օգտագործման վերաբերյալ, և դա մի տեսակ իրավիճակից դուրս գալու փորձ էր։ Շատ լավ գիտեն, որ վարկի թեման հիմնականում բլեֆ է, և այն իրականացնելը բարդ կլինի։ Այդ երկիրը արդեն փաստացի վաճառված է։ Ցավոք, այսպես են զարգանում գործընթացները», – նշել է Ղավելաշվիլին։

Նա նաև հավելել է, որ հասարակությունը պետք է հասկանա՝ առաջին հերթին պետք է դրվեն երկրի ազգային շահերը։

«Որքան ավելի են բարդանում գործընթացները և ակնհայտ է դառնում ճգնաժամը, այնքան ավելի շատ մարտահրավերների պետք է սպասենք։ Մենք պատրաստ ենք դրան, բայց մեր հասարակությունը պետք է նույնիսկ ավելի լավ պատրաստված լինի։ Մենք պետք է կարողանանք հաղթահարել այն ճգնաժամերը, որոնք ծագում են Եվրոպական Միությունում։ Մենք չենք կարող և չենք հրաժարվի մեր գործընկերությունից։ Մենք ունենք մեր շահերը։ Ահռելի հնարավորություններ կան, բազմաթիվ կարևոր նախագծեր են իրականացվում, և մենք պետք է լինենք այդ գործընթացների մասնակիցը։ Եվրոպան չի կարող հրաժարվել մեզանից, և մենք նույնպես չենք կարող հրաժարվել Եվրոպայից։ Սա մեծ նշանակություն ունի։ Մենք պետք է հետևենք գործընթացներին։ Մենք պատրաստ ենք պատասխան տալ մեր հասարակությանը արդար մոտեցմամբ, հիմնվելով փաստերի վրա, և չթողնենք այն ուժերին, որոնք գիտակցաբար կամ անգիտակցաբար դեմ են Վրաստանին, խոչընդոտել մեր հասարակության զարգացման համար կարևոր նախագծերը», – նշել է Միխեիլ Ղավելաշվիլին։