Միխեիլ Ղավելաշվիլի. Չկա իրականություն, որտեղ որևէ մեկը պատկերացնում է, թե Վրաստանը կգոյատևի առանց Աբխազիայի և Սամաչաբլոյի, երկիրը կմիավորվի, և յուրաքանչյուր մարդ արժանապատվորեն ներկայացված կլինի
Դարեր շարունակ մենք ապրում ենք մեր աբխազ և ոս եղբայրների ու քույրերի հետ, միասին ենք կառուցել մեր պետությունը, հավատում ենք, որ ունենք ընդհանուր արժեքներ, – այս մասին հայտարարել է Վրաստանի նախագահ Միխեիլ Ղավելաշվիլին:
Նրա խոսքով՝ պետությունն ունի քաղաքականություն, որի նպատակը միասնական երկրում խաղաղ համակեցությունն է:
«Այսօր մենք հարգանքի տուրք ենք մատուցում Վրաստանի հերոսներին, ովքեր 18 տարի առաջ ամենաթանկը՝ կյանքը զոհաբերեցին մեր հայրենիքի ազատության և անկախության համար: Եվս մեկ անգամ փառք և պատիվ նրանց հավերժ հիշատակին: Վրաստանը հնագույն քաղաքակրթության երկիր է, տարբեր դարաշրջաններում մենք միշտ ունեցել ենք ակնառու հերոսներ, ովքեր մեր հասարակության համար օրինակ են եղել: Օգոստոսյան պատերազմի հերոս զինվորները մեր օրինակներն են, թե ինչպիսին պետք է լինի Վրաստանի քաղաքացին և վրացի զինվորը: Հավերժ հիշատակ նրանց հոգիներին: Այսօր մեր պաշտպանական ուժերի շարքային զինծառայողից մինչև բարձրաստիճան զինվորականներ բոլորը տոգորված են մեր հերոսների ոգով: Հենց նրանց օրինակով են շարունակում մեր պաշտպանական ուժերի հզորացումն ու զարգացումը: Շնորհակալություն նրանց դրա համար: Ես ուզում եմ խոնարհվել և շնորհակալություն հայտնել մեր հերոսների ծնողներին, ընտանիքի անդամներին, որ հայրենիքի համար նման արժանապատիվ անհատների են մեծացրել: Նաև ցանկանում եմ հիշել այս ողբերգական իրադարձությունների ժամանակ, այս անհավասար մարտում զոհված խաղաղ բնակիչներին և ցավակցել նրանց ընտանիքներին: Մեզանից բոլորին քաջ հայտնի է, որ այս ծանր օրերին մեր երկիրը կորցրեց տարածքներ, թշնամին իրականացրեց մեր տարածքների օկուպացիան, մենք կորցրինք գյուղեր, մարդկանց, և, ցավոք, այս օկուպացիան մինչ օրս շարունակվում է:
Այսօր, ինչպես երբեք, Վրաստանը անկախ է և ինքնիշխան: Նա ունի ազատ, ազգային շահեր կրող իշխանություն, որն ամեն ինչ կանի, որպեսզի վերականգնվի մեր տարածքային ամբողջականությունը: Մենք ունենք նպատակաուղղված քաղաքականություն, որը ծառայում է խաղաղ ճանապարհով մեր ոս և աբխազ եղբայրներին ու քույրերին հաշտեցնելուն, միասնական պետությունում խաղաղ համակեցության շարունակմանն ու զարգացմանը: Վստահ եմ, որ ավելի ու ավելի շատ մարդիկ կկիսեն այն ոգին, որն ունի մեր պետությունը: Չկա իրականություն, որտեղ որևէ մեկը պատկերացնում է, թե առանց Աբխազիայի և Սամաչաբլոյի կգոյատևի Վրաստանը: Աշխարհում բոլորը պետք է գիտակցեն՝ Վրաստանի ոչ մի քաղաքացի, ոչ մի փուլում թույլ չի տա, որ այդ տարածքները լինեն առանց Վրաստանի: Սա աքսիոմ է, և ոչ ոք չի կարող ժխտել: Սրանից ելնելով՝ մենք բոլորս տոգորված ենք այս ոգով: Դարեր շարունակ մենք ապրում ենք մեր աբխազ և ոս եղբայրների ու քույրերի հետ, միասին ենք կառուցել մեր պետությունը: Հավատում ենք, որ ունենք ընդհանուր արժեքներ, խառն ընտանիքներ են: Որպեսզի դրականորեն հանգուցալուծենք այս ողբերգական օրերը, դա մեր նպատակն է, և վստահ եմ, որ այս գործընթացն անպայման կկայանա: Վրաստանը կմիավորվի, և յուրաքանչյուր բնակիչ արժանապատվորեն ներկայացված կլինի պետության մեջ», – հայտարարել է Ղավելաշվիլին: