«Միացյալ ազգային շարժման» անդամ Գիորգի Խվեդելիանին եւ «Եվրոպական Վրաստանի» անդամ Գիորգի Նոնիաշվիլին դիմել են Վրաստանի կենտրոնական ընտրական հանձնաժողովին՝ ՏԻՄ ընտրություններին մասնակցելու համար:

«Պաշտոնապես, «Միացյալ ազգային շարժումը» դիմել է ԿԸՀ` ընտրություններին գրանցվելու համար: Մենք մասնակցում ենք այս շատ կարևոր ընտրություններին, որոնք հանրաքվե են՝ ինչպես շարունակել կյանքը, շարունակել այս բռնությունը, կոռուպցիան, աղքատությունը, անարդարությունը թե մեկընդմիշտ փոխել «Վրացական երազանքը» և սկսել զարգացման ճանապարհը: Մենք ներգրավվում ենք շատ լուրջ պայքարին և վստահ ենք, որ կհաղթենք այս ճակատամարտում», – ասաց Գիորգի Խվեդելիանին:

Գիորգի Նոնիաշվիլիի խոսքով, այս ընտրությունները պայքար են հանուն ազատության:

«Եվրոպական Վրաստանը» այս ընտրություններին գրանցման հայտ է ներկայացրել: Այս ընտրությունները պարզապես ՏԻՄ ընտրություններ չեն, այս ընտրությունները պայքար են հանուն ազատության, այս երկրի եվրոպական ապագայի, քաղաքակիրթ աշխարհի մաս լինելու և այս պատմական հնարավորությունը բաց չթողնելու համար: «Եվրոպական Վրաստանի» հիմնական մարտահրավերը այս իշխանությունը տապալելն է», – ասել է Նոնիաշվիլին: