«Միացյալ ազգային շարժում» կուսակցության նախագահ Թինա Բոկուչավայի և գլխավոր քարտուղար Պետրե Ցիսկարիշվիլիի հետ հանդիպումից հետո ամերիկացի կոնգրեսական Ջո Ուիլսոնը կոչ է արել Սիրիային չեղարկել Վրաստանի օկուպացված տարածքների ճանաչումը։ Տեղեկությունը տարածում է կուսակցության մամուլի ծառայությունը։

Ինչպես հաղորդվում է, Վրաստանի օկուպացված տարածքների՝ Աբխազիայի և Ցխինվալիի շրջանների Սիրիայի կողմից ճանաչման վերանայման հարցը «Միացյալ ազգային շարժման» ներկայացուցիչները բարձրացրել են Ջո Ուիլսոնի հետ հանդիպման ընթացքում, որը Հելսինկիի հանձնաժողովի համանախագահն է և «Մեգոբարի ակտի» համահեղինակ։

«Հանդիպման ընթացքում կուսակցության ներկայացուցիչները ընդգծել են, որ 2018 թվականին Բաշար Ասադի ռեժիմի կողմից ընդունված որոշումը լուրջ վնաս է հասցնում Վրաստանի ինքնիշխանությանը և խախտում է միջազգային իրավունքը», – նշված է հաղորդագրությունում։

Կուսակցության մամուլի ծառայության տվյալներով՝ հանդիպմանը հաջորդել է Ջո Ուիլսոնի հրապարակային հայտարարությունը, որով նա կոչ է արել Սիրիայի նոր կառավարությանը չեղարկել Ասադի ռեժիմի որոշումը։

«Ինչպես Ուիլսոնը գրել է սոցիալական ցանցերում՝ «այս պարզ քայլը կհաստատի Սիրիայի նոր ուղու հանդեպ խոր ուժն ու հավատարմությունը»։

«Միացյալ ազգային շարժումը» Ուիլսոնի հայտարարությունը համարել է Վրաստանի տարածքային ամբողջականության հանդեպ ամուր աջակցության դրսևորում։