Գորիի շրջանային դատարանն ամբողջությամբ կիսել է դատախազության ներկայացրած ապացույցները և Մեծ Բրիտանիայի քաղաքացու խմբակային դաժան սպանության և առանձնահատուկ դաժանության համար մեղադրվողներին դատապարտել 20 և 21 տարվա ազատազրկման։ Իսկ առանձնապես ծանր հանցագործության մասին չհայտնելու համար մեկ անձը դատապարտվել է 6 տարի ազատազրկման։

Քննչական գերատեսչության տվյալներով՝ դատավարության ընթացքում հետազոտված ապացույցները հաստատել են, որ 2021 թվականի հոկտեմբերի 7-ին Գորիում չորս անձ, այդ թվում՝ անչափահաս, հարձակվել են Մեծ Բրիտանիայի քաղաքացու վրա՝ բռնությամբ խլելով նրա բջջային հեռախոսը, բանկային պլաստիկ քարտը և կանխիկ գումարը։

Դրանից հետո ամբաստանյալները հանցագործությունը կոծկելու նպատակով տուժողին պատճառել են բազմաթիվ վնասվածքներ, ապա խեղդել Մտկվարի գետում։

Հետաքննությամբ պարզվել է նաև, որ մեղադրյալը դեպքի մասին պատմել է ընկերոջը, ով թեև գիտեր, որ առանձնապես ծանր հանցագործություն է կատարել, սակայն այդ մասին չի հայտնել իրավապահներին։

Իրավապահները հոկտեմբերի 10-ին ձերբակալել են բոլոր հինգ մեղադրյալներին։ Չորս մեղադրանք է առաջադրվել կանխամտածված սպանության և ծանրացուցիչ հանգամանքներում կատարված ավազակային հարձակման համար։ Իսկ մեկ անձի մեղադրանք է առաջադրվել առանձնապես ծանր հանցագործության մասին չհայտնելու համար։

Գորիի շրջանային դատարանը մեղադրական եզրակացությամբ մեղավոր է ճանաչել բոլոր հինգ ամբաստանյալներին։ Ծանր հանգամանքներում կանխամտածված սպանության, ինչպես նաև խմբակային ավազակային հարձակման համար մեղադրյալները դատապարտվել են համապատասխանաբար 21 և 20-20 տարվա ազատազրկման, իսկ առանձնապես ծանր հանցագործության մասին չհայտնելու համար՝ 6 տարի ազատազրկման։ Ինչ վերաբերում է անչափահաս մեղադրյալին, ապա դատավճռի նիստը կանցկացվի անչափահասների նկատմամբ արդարադատության օրենսգրքի պահանջներին համապատասխան՝ դատավճիռը կայացնելուց ոչ ուշ, քան 7 օր հետո»,- ասված է դատախազության հաղորդագրությունում։