Սամեգրելո-Զեմո Սվանեթիի ոստիկանության և ՆԳՆ հատուկ հանձնարարությունների բաժնի ծառայողների կողմից ձեռնարկված օպերատիվ և քննչական գործողությունների արդյունքում երկու անձի մեղադրանք է առաջադրվել՝ խմբակային կողոպուտի, սպանության փորձի, ինչպես նաև ապօրինի կերպով հրազեն գնելու, պահելու և կրելու մեղադրանքով։

Տեղեկությունը տարածում է ՆԳՆ-ն։

«Քննությամբ պարզվել է, որ այս տարվա հունվարի 5-ին ամբաստանյալները կողոպտել են Զուգդիդիից Մեստիա մեկնող երկու օտարերկրյա քաղաքացիների, հափշտակել նրանց բջջային հեռախոսները։

Հանցագործությունը կոծկելու համար մեղադրյալն ավելի ուշ դիակը նետել է գետը և թաքնվել։

Ներքին գործերի նախարարության տարբեր ստորաբաժանումների աշխատակիցները երկու օր շարունակ համապատասխան գործողություններ են իրականացրել։

Քննչական գործողություններ են իրականացվել ինչպես Մեստիայի մունիցիպալիտետում, այնպես էլ Սամեգրելո-Զեմո Սվանեթիի ողջ տարածքում, որում ներգրավված է եղել նաև ուղղաթիռը։

Ձեռնարկված քննչական գործողությունների արդյունքում ոստիկանները բերման են ենթարկել հանցագործության մեջ մեղադրվող երկու անձանց։

Օտարերկրյա քաղաքացի Վ.Ս.-ի դիակը հայտնաբերվել է Մեստիայի մունիցիպալիտետի տարածքում՝ Նակրա գետում»,- ասվում է ՆԳՆ տեղեկատվության մեջ։

Նախաքննությունը կատարվում է Քրեական օրենսգրքի 179-րդ, 19-109-րդ և 236-րդ հոդվածներով։ Հանցագործությունը պատժվում է 16-ից 20 տարի ժամկետով կամ ցմահ ազատազրկմամբ։