Մենք պատրաստ ենք Վրաստանին թեկնածուի կարգավիճակ տալ, հենց որ նա արձագանքի Եվրահանձնաժողովի զեկույցում նշված առաջնահերթություններին. Շառլ Միշել
Մենք որոշում ենք կայացրել ճանաչել Ուկրաինայի, Մոլդովայի և Վրաստանի եվրոպական հեռանկարը։ Այս երկրների և մարդկանց ապագան Եվրամիությունում է, հայտարարել է Եվրոպական խորհրդի նախագահ Շառլ Միշելը Եվրախորհրդարանում Ուկրաինայի հարցի վերաբերյալ բանավեճի ժամանակ։
Նրա խոսքով, Ուկրաինային և Մոլդովային թեկնածուի կարգավիճակ շնորհելով՝ իրենք ուժեղ ուղերձ են հղել այս երկրների ժողովրդին՝ Եվրամիության քաղաքացիներին, ինչպես նաև պատրաստ են Վրաստանին թեկնածուի կարգավիճակ տալ, հենց որ նա արձագանքի առաջնահերթություններին։ Նշված է Եվրահանձնաժողովի զեկույցում:
«Կրեմլի բարբարոսական պատերազմը տեկտոնական փոփոխություններ մտցրեց մեր մայրցամաքում և ստեղծեց նոր քաղաքական իրականություն։ Անցյալ շաբաթ Եվրամիության 27 առաջնորդների հետ միասին մենք ընդունեցինք աշխարհաքաղաքական կարևոր որոշումներ։ Նախ՝ մենք որոշեցինք ճանաչել Ուկրաինայի, Մոլդովայի և Վրաստանի եվրոպական հեռանկարը։ Այս երկրների ու մարդկանց ապագան Եվրամիությունում է: Մենք նաև որոշեցինք թեկնածուի կարգավիճակ տալ Ուկրաինային և Մոլդովային՝ ուժեղ ուղերձ հղելով նրանց ժողովրդին և Եվրամիության մեր քաղաքացիներին։ Մենք պատրաստ ենք նաև Վրաստանին թեկնածուի կարգավիճակ տրամադրել, հենց որ նա արձագանքի Եվրահանձնաժողովի զեկույցում նշված առաջնահերթություններին»,- ասել է Շառլ Միշելը։