Ընդլայնման հարցերով եվրահանձնակատար Մարտա Կոսին մտահոգություն է հայտնում Ուկրաինայի Ռադայի կողմից հաստատված օրենքի վերաբերյալ, որը վերացնում է Ուկրաինայի ազգային հակակոռուպցիոն բյուրոյի և կոռուպցիայի դեմ պայքարի մասնագիտացված դատախազության անկախությունը։

Ինչպես գրում է եվրահանձնակատարը X սոցիալական ցանցում, այս գործակալությունների անկախությունը կարևոր է Ուկրաինայի եվրոպական ինտեգրման համար։

«Ես լրջորեն մտահոգված եմ Ռադայում այսօրվա քվեարկությամբ։ Ուկրաինայի ազգային հակակոռուպցիոն բյուրոյի անկախությունը պաշտպանելու հիմնական մեխանիզմների վերացումը լուրջ հետքայլ է։ Այնպիսի ինստիտուտների անկախությունը, ինչպիսիք են Կոռուպցիոն ազգային բյուրոն և Կոռուպցիոն դեմ պայքարի մասնագիտացված դատախազությունը, կարևոր է Ուկրաինայի՝ դեպի Եվրամիություն տանող ճանապարհի համար։ Օրենքի գերակայությունը մնում է ԵՄ անդամակցության բանակցությունների հիմքում», – գրում է Մարթա Կոսը։

Ուկրաինայի Վերխովնա Ռադայի խոսնակ Ռուսլան Ստեպանչուկն այսօր ստորագրել է Ուկրաինայի քրեական դատավարության օրենսգրքում փոփոխություններ կատարելու մասին օրենքը։ Փոփոխությունները վերացնում են Ազգային հակակոռուպցիոն բյուրոյի և Կոռուպցիայի դեմ պայքարի մասնագիտացված դատախազության անկախությունը և դրանք ենթարկում գլխավոր դատախազի որոշումներին։

Խորհրդարանի կողմից հաստատված օրենքն ուղարկվել է Ուկրաինայի նախագահ Վլադիմիր Զելենսկիին՝ ստորագրման համար։

Կոռուպցիայի դեմ պայքարի ազգային բյուրոյի և Կոռուպցիայի դեմ պայքարի մասնագիտացված դատախազության ղեկավարները կոչ են արել Վլադիմիր Զելենսկիին չստորագրել օրինագիծը։