ՆԱՏՕ-ի դաշնակիցները լիակատար համերաշխություն են հայտնում Լեհաստանին և դատապարտում Ռուսաստանի անխոհեմ գործողությունները, – այս մասին ՆԱՏՕ-ի գլխավոր քարտուղար Մարկ Ռյուտեն հայտարարել է դաշինքի շտաբ-բնակարանում կայացած բրիֆինգի ժամանակ՝ արձագանքելով Լեհաստանում ռուսական անօդաչուների խոցմանը։

Նրա խոսքով՝ ՆԱՏՕ-ի հիմնական առաքելությունն է զսպել ագրեսիան և պաշտպանել դաշինքի բոլոր անդամներին ցանկացած վտանգից։

«Մեր հիմնական խնդիրն է ագրեսիայի զսպումը և դաշինքի բոլոր անդամների պաշտպանությունը ցանկացած վտանգից, որի առջև կանգնած ենք։ Մեր արևելյան թևի պաշտպանությունը չափազանց կարևոր է։ Հենց այդ պատճառով մենք տեղակայել ենք չորրորդ ցամաքային ուժեր ութ երկրում՝ յուրաքանչյուր դաշնակցի մասնակցությամբ։ Մենք ունենք հակաօդային պաշտպանություն, ցամաքային, ծովային և օդային համակարգեր։ Այստեղ ևս՝ Եվրոպայի և Հյուսիսային Ամերիկայի դաշնակիցների ներդրմամբ, ամեն օր միասին աշխատում ենք, որպեսզի ապահովենք դաշնակիցների տարածքի յուրաքանչյուր սանտիմետրի պաշտպանությունը։ Տարվա սկզբին մենք ստեղծեցինք «Բալթյան պահակախումբը», որպեսզի օգնենք երկրներին Բալթիկ ծովում կարևոր ենթակառուցվածքների պաշտպանությունում», – հայտարարել է նա։

Նրա խոսքով՝ դաշինքը որոշում է ընդունել, որ ՆԱՏՕ-ի արևելյան հատվածում առաջիկա օրերին սկսվեն զորավարժություններ դաշնակից երկրների մասնակցությամբ, այդ թվում՝ Դանիայի, Ֆրանսիայի, Մեծ Բրիտանիայի, Գերմանիայի և այլ անդամների։

Հիշեցնենք, որ սեպտեմբերի 10-ի գիշերը Ռուսաստանի կողմից Ուկրաինայի դեմ իրականացված լայնածավալ հարձակման ժամանակ մի քանի անօդաչու խախտել է Լեհաստանի օդային տարածքը, որոնք խոցվել են։ Լեհաստանի օդային տարածքի խախտման պատճառով լեհական իշխանությունները պահանջել են ակտիվացնել ՆԱՏՕ-ի կանոնադրության չորրորդ հոդվածը, որը ենթադրում է խորհրդակցություններ դաշնակիցների հետ։