ՆԱՏՕ-ի գլխավոր քարտուղար Մարկ Ռյուտեն կոչ է արել Հյուսիսատլանտյան դաշինքի անդամ երկրներին ավելի շատ անել՝ մեծածավալ պատերազմի պատրաստվելու համար։ Նրա խոսքով՝ առաջիկա 5 տարվա ընթացքում Ռուսաստանը կարող է պատրաստ լինել ՆԱՏՕ-ի վրա հարձակվելու։

«Ռուսաստանը վերադարձրել է պատերազմը Եվրոպա, և մենք պետք է պատրաստ լինենք այնպիսի պատերազմի, ինչպիսին անցել են մեր տատիկներն ու պապիկները», – հայտարարել է Ռյուտեն։

Նրա խոսքով՝ չնայած դաշինքի անդամ երկրները ավելացրել են ռազմական ծախսերը, դա բավարար չէ։

«Հիմա մեր ինքներս մեզ շնորհավորելու ժամանակը չէ։ Ցավոք, շատերը խաղաղ են, շատերը չեն զգում անհապաղ գործողության անհրաժեշտությունը, շատերը կարծում են, որ ժամանակը մեր կողմն է։ Դա այդպես չէ։ Գործելու ժամանակն այժմ է», – նշել է ՆԱՏՕ-ի գլխավոր քարտուղարը։

Ռյուտեն նաև ընդգծել է, որ Վլադիմիր Պուտինը արդեն ապացուցել է, որ պատրաստ է միլիոնավոր քաղաքացիների կյանքը վտանգի տակ դնելու։

«Պուտինը իր հպարտության գինը վճարում է իր ժողովրդի արյամբ։ Եթե նա պատրաստ է այսպես զոհաբերել սովորական ռուսներին, ապա մեզ հետ ինչ կարող է անել, եթե հնարավորություն ունենա?» – ասել է Ռյուտեն։

Նա նաև նշել է, որ առանց Չինաստանի աջակցության, Ռուսաստանը չի կարողանա շարունակել պատերազմը Ուկրաինայում։

«Չինաստանը Ռուսաստանի փրկօղակն է։ Առանց Չինաստանի աջակցության՝ Ռուսաստանը չի կարողանա շարունակել պատերազմը։ Ռուսական անօդաչու սարքերում և այլ համակարգերում կարևորագույն էլեկտրոնային բաղադրիչների 80 տոկոսը արտադրվում է Չինաստանում։ Երբ խաղաղ քաղաքացիներ են մահանում Կիևում կամ Խարկովում, այն զենքում, որով նրանց սպանում են, չինական տեխնոլոգիաներ են», – հայտարարել է Ռյուտեն։