ՆԱՏՕ-ի գլխավոր քարտուղար Մարկ Ռյուտեն հայտարարել է, որ Ռուսաստանի կողմից գիշերը իրականացված համակցված հարձակումը կրկին ապացուցում է, որ Մոսկվան հավատարիմ չէ իրական խաղաղ բանակցություններին։

Ռյուտեն այս հայտարարությունը արել է Ուկրաինայի Գերագույն ռադայում ելույթի ընթացքում՝ հիշատակելով նաև ԱՄՆ-ի, Ռուսաստանի և Ուկրաինայի մասնակցությամբ նախատեսված եռակողմ բանակցությունները, որոնք տեղի են ունենալու փետրվարի 4-ին և 5-ին Աբու Դաբիում։

«Այստեղ որոշակի առաջընթաց կա, սակայն Ռուսաստանը շարունակում է հարձակումները, ինչպես եղել է անցած գիշեր։ Սա վկայում է նրանց ոչ լուրջ վերաբերմունքի մասին խաղաղության հարցում», – նշել է Ռյուտեն։

Նրա խոսքով՝ արևմտյան գործընկերները շարունակելու են ճնշում գործադրել Ռուսաստանի վրա և աջակցել Ուկրաինային։

Ռյուտեն ընդգծել է նաև, որ ուկրաինացիների ընկերները, ինչպես նաև հենց ուկրաինացիները, «չեն ցանկանա երկրորդ Բուդապեշտյան հուշագիրը կամ ևս մեկ «Մինսկ»»։

«ՆԱՏՕ-ն կկանգնի Ուկրաինայի կողքին առաջիկա տարիներին։ Ձեր անվտանգությունը մեր անվտանգությունն է, ձեր խաղաղությունը՝ մեր խաղաղությունը, և այն պետք է լինի արդար և կայուն», – հայտարարել է նա Ուկրաինայի խորհրդարանում։

Հիշեցնենք, որ Մարկ Ռյուտեն Կիև է այցելել փետրվարի 3-ին։ Ուկրաինայի նախագահ Վլադիմիր Զելենսկու հետ միասին նա ծաղկեպսակ է դրել Կիևի Ազգային հիշատակի ժողովրդական հուշահամալիրում՝ հարգանքի տուրք մատուցելով այն հերոսների հիշատակին, որոնք զոհվել են երկրի պաշտպանության համար։