Մարկ Ռուտեն հաստատում է, որ Դոնալդ Թրամփը չի քննարկում Ուկրաինայի անդամակցությունը ՆԱՏՕ-ին
ՆԱՏՕ-ի գլխավոր քարտուղար Մարկ Ռուտեն հաստատել է, որ ԱՄՆ նախագահ Դոնալդ Թրամփը չի քննարկում Ուկրաինայի անդամակցությունը ՆԱՏՕ-ին։ Ռուտեն այս մասին խոսել է «Բլումբերգին» տված հարցազրույցում։
Լրագրողի այն հարցին, թե արդյոք Թրամփը բանակցությունների սեղանից հանելու է Ուկրաինայի ՆԱՏՕ-ին անդամակցելու հարցը, Ռուտեն դրական պատասխան է տվել։
Նա նաև պատասխանել է հարցին, թե պատերազմը ավարտվելու դեպքում արդյոք երկրները կցանկանան վերականգնել հարաբերությունները Ռուսաստանի հետ։
«Նախ պետք է մեծացնենք ճնշումը Ռուսաստանի վրա՝ պատերազմի ավարտի համար, բայց երկարաժամկետ հեռանկարում Ռուսաստանը մնում է այնտեղ, այսինքն՝ չի վերանալու։
2014 թվականից առաջ ես բազմաթիվ բանակցություններ եմ ունեցել նրանց հետ, իմ վարչապետության ժամանակ շատ հանդիպումներ եմ ունեցել Պուտինի հետ։
Կարծում եմ, նորմալ կլիներ, եթե պատերազմը դադարեցվեր, և Եվրոպան ու ԱՄՆ-ն քայլ առ քայլ վերականգնեին իրենց հարաբերությունները Ռուսաստանի հետ, սակայն մենք դեռ հեռու ենք այդ պահից։
Մենք պետք է շարունակենք ճնշումը, որպեսզի Ռուսաստանը պատրաստ լինի լրջորեն մասնակցել բանակցություններին ԱՄՆ-ի և, իհարկե, Ուկրաինայի կառավարության հետ», – հայտարարել է Ռուտեն։