Վրաստանի էկոնոմիկայի և կայուն զարգացման նախարար Մարիամ Քվրիվիշվիլին այցելել է Կախեթի՝ ծանոթանալու «Ստորի ՀԷԿ»-ի և «Ստորի ՀԷԿ – Նոր Թելավի» էլեկտրահաղորդման գծի շինարարական աշխատանքներին։ Այս մասին հայտնում է Էկոնոմիկայի նախարարությունը։

Մարիամ Քվրիվիշվիլին նշել է, որ երկրի էներգետիկ անկախության և էներգետիկ անվտանգության ամրապնդումը կառավարության տնտեսական քաղաքականության գերակա ուղղություններից է, ինչը կարևոր է Վրաստանի հետագա զարգացման համար։ Նրա գնահատմամբ՝ այս նպատակի իրագործման համար կարևոր են այնպիսի նախագծեր, ինչպիսին է «Ստորի ՀԷԿ»-ը։

Կասկադային «Ստորի ՀԷԿ»-ի շինարարությունն ավարտվելու է 2026 թվականին։ Այն կունենա 47.6 մեգավատտ դրվածքային հզորություն և տարեկան կարտադրի շուրջ 208 միլիոն կիլովատ ժամ էլեկտրաէներգիա։ ՀԷԿ-ը կկապվի երկրի էլեկտրահաղորդման ցանցին 110 կՎ լարման նոր «Ստորի ՀԷԿ – Նոր Թելավի» գծի միջոցով, որն շահագործման կհանձնվի ՀԷԿ-ի հետ միաժամանակ։

«Նման նախագծերը միաժամանակ ծառայում են մի քանի նպատակների․ «Ստորի ՀԷԿ»-ի նման հզորություն ունեցող կայանը կարևոր է մեր երկրի էներգետիկ համակարգի զարգացման համար, կավելանա էլեկտրաէներգիայի արտադրությունը, ինչը կնպաստի բնակչության և այլ սպառողների կայուն էլեկտրամատակարարմանը։ Չափազանց կարևոր է նաև, որ տարածաշրջանում կստեղծվեն մշտական աշխատատեղեր, և կաշխատեն տեղի բնակիչները», – ասել է նախարար Քվրիվիշվիլին։

Նրա հետ միասին շինարարական աշխատանքներին ծանոթացել են ենթակառուցվածքների նախարար Ռևազ Սոխաձեն, Կախեթիում նահանգապետի տեղակալ Մամուկա Բուրդիաշվիլին, էկոնոմիկայի նախարարի տեղակալ Ինգա Փխալաձեն և «Վրաստանի պետական էլեկտրասիստեմ» ընկերության գլխավոր տնօրեն Վանո Զարդիաշվիլին։

Քվրիվիշվիլին հատուկ ուշադրություն է դարձրել էլեկտրահաղորդման ենթակառուցվածքի արդիականացման գործընթացին, որը, կառավարության որոշմամբ, իրականացնում է «Վրաստանի պետական էլեկտրասիստեմ»-ը։ Նրա խոսքով՝ Կախեթում «Ստորի ՀԷԿ – Նոր Թելավի» նախագծի իրականացումը էապես կբարելավի ցանցի կայունությունն ու կուժեղացնի Արևելյան Վրաստանի էլեկտրաէներգետիկ թողունակությունը։

Նշենք, որ Կախեթի այցի ընթացքում Վանո Զարդիաշվիլին և թուրքական Mitas Energy and Metal Construction Inc ընկերության ներկայացուցիչ Բարիշ Էլբասիօղլուն ստորագրել են թարմացված պայմանագիր «Ստորի ՀԷԿ – Նոր Թելավի» 110 կՎ էլեկտրահաղորդման գծի կառուցման վերաբերյալ։ Նախագծի նախնական արժեքը կազմում էր 12,5 միլիոն եվրո, իսկ նոր պայմանագրով այն կրճատվել է 3 միլիոն ԱՄՆ դոլարով։ Նախագիծն իրականացվում է Էլեկտրաէներգետիկ ցանցի բարելավման ծրագրի (ENIP) շրջանակում՝ KfW զարգացման բանկի ֆինանսավորմամբ։

Ինչ վերաբերում է «Ստորի ՀԷԿ»-ին, դրա ներդրումային արժեքը կազմում է 90 միլիոն ԱՄՆ դոլար։

««Վրաստանի պետական էլեկտրասիստեմ»-ի և շինարարական ընկերության միջև այս համաձայնագիրը արդեն իսկ լավ օրինակ է ընթացիկ նախագծերի բյուջեի օպտիմալացման, երբ նույն աշխատանքը կարող է կատարվել ավելի էժան՝ լիովին պահպանելով միջազգային չափանիշները», – նշել է Մարիամ Քվրիվիշվիլին։