«Վրաստանին և Սերբիային կապում են ավանդական բարեկամական հարաբերություններ և մշակութային մտերմություն։ Այս մարդկային և մշակութային կապերը մեզ հնարավորություն են տալիս հետագայում էլ ավելի ամրապնդելու մեր քաղաքական երկխոսությունը, տնտեսական համագործակցությունը և ժողովուրդների միջև կապերը», – հայտարարել է Վրաստանի էկոնոմիկայի և կայուն զարգացման նախարար Մարիամ Քվրիվիշվիլին։

Նախարարը Սերբիայի մայրաքաղաք Բելգրադում կայացած Վրաստան–Սերբիա առևտրի և տնտեսական համագործակցության համատեղ կառավարական հանձնաժողովի երկրորդ նիստում իր ելույթի ընթացքում խոսել է երկու երկրների միջև քաղաքական և տնտեսական համագործակցության խորացման կարևորության մասին։

«Ցանկանում եմ հատուկ նշել այն փոխադարձ աջակցությունն ու հարգանքը, որը Վրաստանն ու Սերբիան ցուցաբերում են միմյանց ինքնիշխանության և տարածքային ամբողջականության հանդեպ։ Այս տարի մենք նշում ենք Վրաստանի և Սերբիայի Հանրապետության միջև դիվանագիտական հարաբերությունների հաստատման 30-ամյակը։ Այս կարևոր տարելիցը մեզ հնարավորություն է տալիս խոսելու մեր երկկողմ հարաբերությունների աճող դինամիկայի մասին», – նշել է Մարիամ Քվրիվիշվիլին։

Նախարարը կարևորել է Վրաստանի նախագահի վերջերս Սերբիա կատարած այցը՝ այն գնահատելով որպես երկրների միջև համագործակցության խորացման պատրաստակամության դրսևորում։ Նա նաև դրական է գնահատել Սերբիայում Վրաստանի լիարժեք դիվանագիտական ներկայացուցչության բացման որոշումը։

«Մենք ողջունում ենք Սերբիայի կառավարության որոշումը առաջիկա շրջանում Թբիլիսիում բացել մշտական դեսպանություն, ինչը ևս մեկ կարևոր քայլ կլինի մեր գործընկերության խորացման ճանապարհին», – հայտարարել է Մարիամ Քվրիվիշվիլին։