Երկրի համար պատմական նախագծի՝ Անակլիայի խորջրյա նավահանգստի շինարարությունը սկսվել է. այս մասին Անակլիայում հայտարարել է էկոնոմիկայի և կայուն զարգացման նախարար Մարիամ Քվրիվիշվիլին, ով տեղում ծանոթացել է Անակլիայի նավահանգստի տարածքում ընթացող աշխատանքներին:

Նախարարի գնահատմամբ՝ գործընթացն արդեն թեւակոխել է բավականին ակտիվ փուլ։

«Անցած ժամանակահատվածում մենք ինտենսիվ բանակցություններ ենք վարել կապալառու ընկերության հետ, նրանց հետ միասին օպտիմալացրել ենք նախնական պայմանագրի արժեքը, և նախագիծն էժանացել է 52 միլիոն դոլարով։ Անակլիայի խորջրյա նավահանգիստը մեր երկրի տնտեսության համար ռազմավարական նշանակության նախագիծ է։ Այն լինելու է համալիր օբյեկտ, որը, մի կողմից, ներառելու է նավահանգստային, իսկ մյուս կողմից՝ հարակից ենթակառուցվածքները, այդ թվում՝ ազատ արդյունաբերական գոտին։ Նախագծի շրջանակներում կկառուցվեն նաև նավահանգիստ տանող ճանապարհ և երկաթուղի, ինչը կնպաստի նավահանգստի անխափան աշխատանքին։ Այս ամենը երաշխիք է այն բանի, որ Անակլիան արժանի տեղ կզբաղեցնի ոչ միայն Վրաստանի, այլև ողջ տարածաշրջանի նավահանգստային ենթակառուցվածքում»,- նշել է էկոնոմիկայի նախարարը։

Մարիամ Քվրիվիշվիլիի տեղեկացմամբ՝ մոտ ապագայում կսկսվի նավահանգստի հետ կապող ճանապարհի և 18 կիլոմետրանոց երկաթգծի շինարարությունը։

«Կառավարությունն արդեն ներկայացրել է Վրացական երկաթուղու տասնամյա պատմական թարմացման ծրագիրը, որտեղ նշվել է, որ երկաթուղին ինտեգրված տրանսպորտային-լոգիստիկ համակարգի մաս է, իսկ բեռնաշրջանառության աճը, որը կիրականացնի երկաթուղին, պահանջում է հզոր ծովային դարպաս։ Հենց այդ պատճառով Անակլիայի խորջրյա նավահանգստի նախագիծն այս մասշտաբային գործընթացի տրամաբանական շարունակությունն ու պսակող տարրն է։ Երկաթուղու հզորացումը և Անակլիայի զարգացումը փոխկապակցված են, և դրանք միասին ստեղծում են Վրաստանը՝ որպես տարածաշրջանի հուսալի, արդյունավետ և մրցունակ կապող հանգույց (հաբ)»,- նշել է Մարիամ Քվրիվիշվիլին։