Եվրոպական ինտեգրման հանձնաժողովի նախագահ Մակա Բոճորիշվիլին հանդիպել է Ֆրանսիայի Հանրապետության Եվրոպայի և արտաքին գործերի նախարարության Կովկասի և Կենտրոնական Ասիայի դեպարտամենտի ղեկավար Մաթյո Կոմբի և Եվրոպական միության արտաքին կապերի բաժնի ղեկավար Բենուա Լերոզի հետ։

Խորհրդարանի մամուլի ծառայությունից հայտնում են, որ հանդիպման ընթացքում քննարկվել են Վրաստանի՝ Եվրամիությանն ինտեգրման հետ կապված հարցեր, Եվրահանձնաժողովի կողմից տրված դրական հանձնարարականը՝ երկրին Եվրամիության թեկնածու երկրի կարգավիճակ տալու վերաբերյալ, և առաջարկությունների կատարման ընթացքը։

Ըստ նրանց հաղորդագրության, նրանք քննարկել են նաև Եվրամիության խորհրդի շրջանակներում քննարկվելիք հարցերը և դեկտեմբերին Ֆրանսիայի դիրքորոշումն այս առնչությամբ։

Մակա Բոճորիշվիլիի խոսքով՝ Վրաստանը կշարունակի բարեփոխումների ճանապարհը, որպեսզի երկիրը պատրաստ լինի ԵՄ անդամակցությանը։ Խորհրդարանի տեղեկատվության համաձայն՝ Մակա Բոճորիշվիլին ընդգծել է այս գործընթացում Եվրամիության և նրա անդամ երկրների հետ համագործակցության կարևորությունը։

«Հանդիպման ընթացքում անդրադարձ է կատարվել առաջիկայում նախատեսված քայլերին։ Եվրոպական ինտեգրման հանձնաժողովի նախագահը նշել է, որ Եվրամիության հետևյալ առաջարկությունների կատարման գործընթացն արագացնելու նպատակով Վրաստանի կառավարությունը հաստատել է գործողությունների ծրագիրը»,- նշված է խորհրդարանի տարածած տեղեկատվության մեջ։