Այսօր այս դահլիճում կան բազմաթիվ հարգելի գործընկերներ, ովքեր վերջին մեկուկես տարվա ընթացքում վճռականորեն և բարձրաձայն աջակցել են Վրաստանի ինտեգրմանը Եվրամիությանը, ցանկանում եմ շնորհակալություն հայտնել այն ներդրման համար, որը մեծ ազդեցություն ունեցավ Եվրամիության որոշման վրա,- այս մասին Եվրամիության անդամ երկրների խորհրդարանների Եվրաինտեգրման հանձնաժողովների նախագահների հանդիպմանը, հայտարարել է Եվրաինտեգրման հանձնաժողովի նախագահ Մակա Բոճորիշվիլին:

Բոճորիշվիլիի խոսքով, այս անկասկած պատմական որոշումը ամուր հիմք դրեց վրաց ժողովրդի դարավոր երազանքի իրականացման համար։

«Այս պատմական պահին հասնելը հեշտ չի եղել բարդ մարտահրավերների և ապատեղեկատվական ինտենսիվ արշավների պայմաններում: Իմ շնորհակալությունն եմ հայտնում բոլորին, ովքեր պատմությունը վերաշարադրելու փորձի փոխարեն օգնեցին մեզ սկսել գրել Վրաստանի պատմության նոր, եվրոպական էջը։ Մենք միամիտ չենք և քաջ գիտակցում ենք, թե որքան դժվար ճանապարհ է պետք անցնել վերջնական նպատակին հասնելու և եվրոպական ընտանիքի անբաժանելի մասը դառնալու համար։ Սակայն այսօր մենք կարող ենք ավելի մեծ հույսով ու ուժով առաջ գնալ, քանի որ միասնական ջանքերով ենք քայլելու ընդհանուր նպատակին հասնելու համար։ Ընդհանուր նպատակն ավելի մեծ, ուժեղ և ավելի լավ Եվրոպան է։ Հուսով եմ, որ Եվրամիությունում Բելգիայի նախագահությունը կնպաստի այս գործընթացին, և Վրաստանը կկարողանա էլ ավելի մոտենալ Եվրամիությանը»,- ասել է Բոճորիշվիլին։