«Ազգային շարժման» բոլոր գործողություններն ու հայտարարությունները հաստատում են, որ սա հակադեմոկրատական կուսակցություն է, որը շատ հեռու է Վրաստանի շահերից, ինչպես նաև կողմնակից է արտաքին միջամտություններին, – այս մասին հայտարարել է Վրաստանի արտգործնախարար Մակա Բոչորիշվիլին։

Բոչորիշվիլուն հարց է ուղղվել «Ազգային շարժման» անդամ Լևան Սանիկիձեի հայտարարության վերաբերյալ, որտեղ Սանիկիձեն նշել է. «Իվանիշվիլու իշխանության փլուզման 70 տոկոսը որոշվում է երկրի սահմաններից դուրս, իսկ մնացած 30 տոկոսը՝ ներսում։ Ալիքը ունի իր տրամաբանությունը, որը նախապատրաստում է պահանջում։ Ես այն զգացողությունը չունեմ, թե վաղը 200 հազար մարդ դուրս կգա։ Իվանիշվիլու հիմնական վախը երկրի սահմաններից դուրս է։ Այս պարագայում «Ազգային շարժման» արտաքին թիմից ավելին ոչ ոք չի անում»։

Բոչորիշվիլու գնահատմամբ՝ նրանց երբեք կարևոր չի եղել, թե ինչ է մտածում վրաց ժողովուրդը։

«Սա բազմիցս ակնհայտ է դարձել նրանց ընտրական ռազմավարությունների իրականացման ժամանակ. խորհրդարանական ընտրությունների ընթացքում նրանք քարոզարշավ են վարում ոչ թե Վրաստանում, այլ արտերկրում՝ այլ քաղաքներում։ Դա հաստատում է, որ նրանց երբեք կարևոր չի եղել, թե ինչ է մտածում կամ որոշում վրաց ժողովուրդը։ Նրանց շահերը բոլորովին այլ տեղում են», – հայտարարել է Մակա Բոչորիշվիլին։