Պաղեստինի ինքնավարության ղեկավար Մահմուդ Աբասը հայտարարել է Գազայի հատված իր այցի մասին։

«Ես ձեր և ողջ աշխարհի առաջ հայտարարում եմ, որ որոշել եմ Պաղեստինի բոլոր առաջնորդների հետ միասին գնալ Գազայի հատված»,- ասել է Աբասը Թուրքիայի խորհրդարանում իր ելույթի ժամանակ։

Բացի այդ, Աբասը կոչ է արել արաբական, իսլամական և այլ բարեկամ երկրների ղեկավարներին, ինչպես նաև ՄԱԿ-ի գլխավոր քարտուղարին միանալ ծրագրված այցին, որպեսզի օգնեն «դադարեցնել Իսրայելի ագրեսիան»:

«Մեր հաջորդ հանգրվանը կլինի սուրբ քաղաք Երուսաղեմը՝ մեր հավերժական մայրաքաղաքը», – ասել է Աբասը։

Պաղեստինի ինքնավարության ղեկավարն ընդգծել է, որ Գազայի հատվածը, Արևելյան Երուսաղեմը և Արևմտյան ափը մեկ աշխարհագրական միավոր են։

«Առանց Գազայի պաղեստինյան պետություն չի կարող լինել։ Նրանց, ովքեր խոսում են Գազայի հետպատերազմյան սցենարների մասին, մենք ասում ենք, որ Գազան, Հորդանան գետի Արևմտյան ափը և Երուսաղեմը մեկ են, որոնք միասին կազմում են պաղեստինյան պետությունը»,- ասել է Աբասը։

Հիշեցնենք՝ Գազայի հատվածի առողջապահական ծառայության տվյալներով՝ հոկտեմբերի 7-ին Իսրայելի ռազմական գործողություններից հետո Գազայի հատվածում ավելի քան 40 հազար մարդ է մահացել։