Լեհական զինվորականները պաշտոնապես ավարտել են ռազմական գործողությունը։ Նրանք գիշերը խոցել են Լեհաստանի օդային տարածքը խախտած անօդաչու թռչող սարքեր։

Զինվորականները կոչ են արել քաղաքացիներին անվտանգության նկատառումներից ելնելով հեռու մնալ և չդիպչել որևէ անհայտ առարկայի։

Լեհական զինվորականները հայտարարել են, որ գործողությանը մասնակցել են ՆԱՏՕ-ի և հոլանդական ինքնաթիռներ։ Լեհաստանի վարչապետ Դոնալդ Տուսկը հայտարարել է, որ արդեն տեղեկացրել է ՆԱՏՕ-ի գլխավոր քարտուղար Մարկ Ռյուտեին խախտման մասին։

Ավելի վաղ լեհական զինվորականները հայտնել էին երկրի օդային տարածքի աննախադեպ խախտման մասին։ Լեհական բանակի օպերատիվ հրամանատարությունը հայտարարության մեջ նշել է, որ «Ռուսաստանի Դաշնության կողմից Ուկրաինայի տարածքի վրա հարձակումը հանգեցրել է Լեհաստանի օդային տարածքի աննախադեպ խախտման անօդաչու թռչող սարքերի կողմից»։