Շատ կարևոր է Վրաստանի վարչապետի այցը Մյունխենի անվտանգության համաժողովի շրջանակներում, որը ևս մեկ լրացուցիչ հարթակ կլինի՝ հայտարարելու մեր արտաքին քաղաքական առաջնահերթությունները՝ կապված Վրաստանի հյուսիսատլանտյան ինտեգրման և ԵՄ ինտեգրման ճանապարհին անսասան դիրքորոշման հետ,- այս մասին հայտարարել է Գերմանիայի Դաշնային Հանրապետությունում Վրաստանի արտակարգ և լիազոր դեսպան Լևան Իզորիան:

Դեսպանի խոսքով, վարչապետը Մյունխենի անվտանգության համաժողովի շրջանակներում շատ կարևոր իրադարձություններ է նախատեսել։

«Կառանձնացնեմ վարչապետի խաղաղության նախաձեռնության ներկայացումը Հարավային Կովկասում, ինչպես նաև մեր տարածաշրջանի տնտեսական զարգացման հետ կապված ծրագրերը։ Քննարկմանը կներկայացվեն մեր համագործակցությանն առնչվող կոնկրետ նախագծեր՝ հատկապես Ադրբեջանի և Հայաստանի հետ, և քննարկմանը կներգրավվեն բարձրաստիճան քաղաքական գործիչներ, հատկապես ԵՄ ներկայացուցիչ Ջոզեֆ Բորելը և ԵԱՀԿ գլխավոր քարտուղարը։ Ինչ վերաբերում է երկկողմ հանդիպումներին, ապա նախատեսվում են բարձր մակարդակի հանդիպումներ, այդ թվում՝ բիզնես ոլորտի ներկայացուցիչների հետ։ Գլոբալ, տարածաշրջանային և երկկողմ հանդիպումների այս բոլոր ասպեկտները զգալի խթան կհանդիսանան մեր երկրի դիրքերի ամրապնդման համար՝ ինչպես քաղաքական ասպարեզում, այնպես էլ տնտեսական նախագծերի իրականացման գործում»,- ասել է Լևան Իզորիան։

Տեղեկությունը տարածում է Վրաստանի վարչապետի մամուլի ծառայությունը։