Լևան Իոսելիանին հայտարարում է, որ քրեակատարողական հիմնարկի տեսանյութի ուսումնասիրության արդյունքում դատապարտյալ Գիորգի Դավիթաձեի նկատմամբ ոչ պատշաճ վերաբերմունքն արտացոլող ապացույցներ չեն գտել
Վրաստանի ժողովրդական պաշտպան Լևան Իոսելիանին հայտարարում է, որ դատապարտյալ Գիորգի Դավիթաձեի դիմումի օրն ևեթ ուսումնասիրել են քրեակատարողական հիմնարկում նկարահանված տեսանյութը և դրանում ոչ պատշաճ վերաբերմունքն արտացոլող ապացույց չեն գտել:
Նրա խոսքով՝ դատապարտյալը մատնանշում էր նաև ուղեկցորդների (բադրագի) կողմից վիրավորանքներն ու հայհոյանքները, և դրա հետ կապված դիմել են դատախազություն, ինչից հետո դատախազությունը քննություն է սկսել:
«Դատապարտյալ Դավիթաձեն դեկտեմբերի 20-21-ի միջադեպի հետ կապված մեզ դիմել է դեկտեմբերի 26-ին: Ինչպես ինքն էր պարզաբանում, ենթադրաբար, իր նկատմամբ տեղի է ունեցել ոչ պատշաճ վերաբերմունք, այդ թվում՝ բռնաբարության սպառնալիք: Նույն օրը մենք ամբողջությամբ ուսումնասիրել ենք ինչպես դեկտեմբերի 20-ի, այնպես էլ 21-ի նյութերը քրեակատարողական հիմնարկում, և նմանօրինակ արարքն արտացոլող ապացույց չի հայտնաբերվել: Բացի այդ, նա պարբերաբար մեզ դիմել է նաև այլ հարցերով, այդ թվում՝ հունիսին, ևս մեկ անգամ խոսել է սեռական բնույթի հանցագործության մասին: Մեր կողմից արդեն իսկ ուսումնասիրված էր այդ ժամանակահատվածը, և նա նույն ժամանակահատվածն էր մատնանշում, հետևաբար, փաստաբանի ներկայությամբ նրան պարզաբանվեց, թե ինչ աշխատանքներ են իրականացվել Ժողովրդական պաշտպանի և նրա ապարատի կողմից, ինչ է տեսնվել, և այդ ժամանակահատվածում ոչ նրա փաստաբանը, ոչ ինքը մեր նկատմամբ որևէ տեսակի բողոք չեն հայտնել: Նա նաև մատնանշում էր ուղեկցորդների կողմից վիրավորանքները, հայհոյանքները, և դրա հետ կապված մենք դիմեցինք դատախազությանը, և դատախազությունը քննություն սկսեց»,- նշել է Լևան Իոսելիանին:
Ի գիտություն՝ Հատուկ քրեակատարողական ծառայությունն այսօր հայտարարություն է տարածել դատապարտյալ Գիորգի Դավիթաձեի վերաբերյալ: Ինչպես նշված է հայտարարության մեջ, սուտ է տեղեկատվությունը, թե իբր №6 քրեակատարողական հիմնարկի վարչակազմի աշխատակիցների կողմից նրա նկատմամբ սեռական բռնություն է կիրառվել: Բացի այդ, հայտարարությունից հետո Հատուկ քրեակատարողական ծառայությունը տարածել է նաև 2025 թվականի դեկտեմբերի 21-ին դատապարտյալ Գիորգի Դավիթաձեին դեէսկալացիոն խցիկ տեղափոխելու և այնտեղ գտնվելն արտացոլող տեսանյութերը: