Ես ողջունում եմ նախաձեռնությունը, որը, հնարավորության դեպքում, որոշ չափով կնվազեցնի լարվածությունը և բևեռացումը երկրում,- ասել է Վրաստանի խորհրդարանի փոխխոսնակ Լևան Իոսելիանին՝ Ջո Բայդենի նախաձեռնած գագաթնաժողովում նախագահ Սալոմե Զուրաբիշվիլիի հայտարարությունը. «Խոստանում եմ, որ կսկսեմ համազգային երկխոսություն, որը կներգրավի ողջ հասարակությունը՝ նորագույն պատմության ընդհանուր ըմբռնում ձեռք բերելու, ցավը հաղթահարելու և առաջ շարժվելու համար»:

Ինչպես նշել է Լևան Իոսելիանին, Վրաստանի նախագահն արդեն մեկ անգամ կարողացել է նման դեր կատարել, երբ Շառլ Միշելի հետ ստեղծեց հարթակ, որպեսզի քաղաքական կուսակցությունները համաձայնության գան և պայմանագիր ստորագրեն։

«Կարծում եմ, շատ ճիշտ է, որ Վրաստանի նախագահը նորից սկսի կոնկրետ քայլեր ձեռնարկել այս ուղղությամբ, և մենք դա միայն ողջունում ենք, քանի որ այս երկրի բևեռացվածության նվազեցումը սկզբունքորեն կարևոր է։ Կարևոր է սկսել այս երկրում այլ տիպի քաղաքականություններ, որոնք հիմնականում կենտրոնացած կլինեն երկրի մարտահրավերների վրա և ոչ միայն միմյանց նկատմամբ շանտաժի և ատելության քարոզարշավի վրա: Որքանով այն ներառական կլինի, կախված է քաղաքական կուսակցությունների և դերակատարների ներգրավվածությունից, կամքից: Մենք պատրաստ ենք մասնակցել այս գործընթացին։ Ես իսկապես ողջունում եմ նախաձեռնությունը, որը կնվազեցնի լարվածությունը և բևեռացումը երկրում, հնարավորության դեպքում գոնե որոշ չափով: Կարծում եմ՝ եթե մենք կարողացանք Շառլ Միշելի հետ նստել մի սեղանի շուրջ՝ խոսելու հարցերի շուրջ և ինչ-որ համաձայնության գալ, այսինքն՝ դրա ռեսուրսը կա, հիմա անպայման պետք է օտարերկրացի լինի՞, որ իրականում երկխոսենք։ Դա նաև մեր քաղաքական մշակույթի որոշիչ գործոնն է, որ վրացիները կարող են խոսել միմյանց հետ, և եթե դրա համար հարթակ լինի, ապա միայն լավ կլինի, որ լինի նախագահական ինստիտուտ։ Մեզ պետք չեն օտարերկրյա միջնորդներ, որպեսզի վրացի քաղաքական գործիչները խոսեն միմյանց հետ, սա իմ վերաբերմունքն է, և մի օր բոլոր կողմերը պետք է քայլեր ձեռնարկեն այդ ուղղությամբ»,- ասել է Իոսելիանին։