Լենթեխիի մունիցիպալիտետի քաղաքապետարանի «Ջոկիա Մեշվելյանի անվան մշակութային կենտրոն» Ա(Ա)Պ-ի տնօրեն Ն.Ս.-ն կաշառք վերցնելու փաստով ձերբակալվել է, – այս մասին հայտարարվել է Վրաստանի ֆինանսների նախարարության քննչական ծառայությունում կայացած ճեպազրույցի ժամանակ։

Ինչպես նշում են քննչական մարմնում, մեղադրյալը ձերբակալվել է պահանջված գումարի մի մասի՝ 7 000 լարիի ստանալու պահին։

«Քննությամբ պարզվել է, որ Ն.Ս.-ն Լենթեխիի մունիցիպալիտետի անունից իրականացնում էր հանրային լիազորություններ, ենթակայության տակ ուներ մշակույթի կենտրոն և դրան կից գործող անսամբլ։ Մեղադրյալը, կաշառքի տեսքով մեծ չափով գումար ստանալու նպատակով, մեկ անձից, որը հետաքրքրված էր համերգային ծրագրի կազմակերպմամբ և դահլիճի 10 օրով վարձակալությամբ, պահանջել է 20 000 լարի։

Նրա պահանջով՝ 5 000 լարին պետք է պաշտոնապես փոխանցվեր Ա(Ա)Պ-ի հաշվեհամարին, իսկ 15 000 լարին պետք է փոխանցվեր իրեն։ Հանցավոր մտադրությունը քողարկելու նպատակով Ն.Ս.-ն կազմել է երկու պայմանագիր՝ մեկը տարածքի վարձակալության, մյուսը՝ կեղծ համերգի անցկացման վերաբերյալ։ Ն.Ս.-ն ձերբակալվել է պահանջված գումարի մի մասի՝ 7 000 լարիի ստանալու պահին։

Քննությունն իրականացվում է Վրաստանի քրեական օրենսգրքի 338-րդ հոդվածի առաջին մասով, որը նախատեսում է ազատազրկում վեցից ինը տարի ժամկետով։

Քննությունը ակտիվորեն շարունակվում է՝ հնարավոր այլ պաշտոնյաների ներգրավվածության բացահայտման նպատակով։ Քննչական ծառայությունը կոչ է անում բոլոր քաղաքացիներին պահպանել Վրաստանի սահմանադրությունն ու օրենքները, հակառակ դեպքում կձեռնարկվեն խստագույն միջոցներ, հատկապես պետական բյուջեի միջոցների յուրացման և կոռուպցիայի դեպքերի կապակցությամբ», – նշում են գերատեսչությունում։