Վրաստանի ՆԳՆ-ից եվրոպական երկրներում նշանակված ոստիկանական կցորդներն իրենց հաջող գործունեության համար պարգեւատրվել են։ Այս մասին տեղեկություն է տարածում Վրաստանի ՆԳՆ-ն։

Վրաստանի ՆԳՆ ոստիկանական կցորդ, գնդապետ Գիորգի Գամսախուրդիան Լեհաստանի Հանրապետության ներքին գործերի նախարար Մարիուշ Կամինսկու կողմից պարգեւատրվել է ոսկե մեդալով՝ Լեհաստանի ոստիկանությանը մատուցած հատուկ ծառայությունների համար։ Նշված մրցանակը Գամսախուրդիային շնորհել է Լեհաստանի ոստիկանության գլխավոր հրամանատար, գեներալ Յարոսլավ Շիմչիկը։ Պարգևատրման արարողությունը տեղի ունեցավ ոստիկանության գլխավոր հրամանատարության շենքում։

Վրաստանի ոստիկանության կցորդ Շալվա Շուբլաձեն պարգեւատրվել է «Կարմիր խաչ» մեդալով։ Վրաստանի ՆԳՆ տեղեկատվության համաձայն՝ մինչ այժմ չի եղել դեպք, որ Իսպանիայում ոստիկանության օտարերկրյա կցորդը պարգեւատրվի նշված տեսակի եւ բարձր կոչման մեդալով։ Շալվա Շուբլաձեն Իսպանիայի ներքին գործերի նախարար Ֆերնանդո Գրանդե Մարլասկայի հրամանով պարգեւատրվել է «Կարմիր խաչ» մեդալով՝ հաշվի առնելով առկա հաջող միջազգային ոստիկանական համագործակցությունը։