Լեհաստանի պաշտպանության նախարար. Վոլինի ողբերգության զոհերի հիշատակը քննարկման ենթակա չէ, կան սահմաններ, որոնք չեն կարող հատվել
Ուկրաինայի նախագահի աշխատակազմի ղեկավար Կիրիլ Բուդանովը հանդիպել է Լեհաստանի պաշտպանության նախարար Վլադիսլավ Կոսինյակ-Կամիշի հետ։
Հանդիպման հիմնական թեման ուկրաինական ստորաբաժանումներից մեկը «Ուկրաինայի ապստամբական բանակի հերոսներ» անվանակոչելն էր։
Կոսինյակ-Կամիշի խոսքով՝ նա Բուդանովին փոխանցել է Լեհաստանի հստակ սպասումները և նշել, որ երկրները գործընկերներ են անվտանգության հարցերում, բայց նրանք պետք է միմյանց պատմեն պատմության մասին ճշմարտությունը։
«Միայն այս կերպ մենք կկարողանանք կառուցել ապագան։ Վոլինի ողբերգության զոհերի հիշատակը քննարկման ենթակա չէ։ Կան սահմաններ, որոնք չեն կարող հատվել», – գրել է Լեհաստանի պաշտպանության նախարարը սոցիալական ցանցերում։
Տեղեկության համար՝ Ուկրաինայի նախագահ Վոլոդիմիր Զելենսկին ուկրաինական բանակի ստորաբաժանումներից մեկին անվանել է «Ուկրաինայի ապստամբական բանակի հերոսներ»։ Զելենսկու խոսքով՝ «նա սա արել է՝ ազգային բանակի պատմական ավանդույթները վերականգնելու համար»։
Լեհական լրատվամիջոցների տվյալներով՝ «Ուկրաինական ապստամբական բանակը» 1943 թվականի հուլիսին համակարգված հարձակում է իրականացրել նախկին Վոլինի վոյեվոդությունում գտնվող մոտ 150 լեհաբնակ քաղաքների վրա, մասնավորապես՝ ներկայիս Ուկրաինայի տարածքում գտնվող Վոլոդիմիրի, Հորոխովի, Կովելի և Լուցկի շրջաններում։
Լեհական լրատվամիջոցները նշում են, որ տարիներ շարունակ Լեհաստանն ու Ուկրաինան տարբեր կարծիքներ են ունեցել ազգայնականների և ապստամբների գործունեության գնահատման վերաբերյալ։ Լեհաստանի համար Վոլինի իրադարձությունները ցեղասպանություն էին, մինչդեռ ուկրաինացիների համար դրանք սիմետրիկ զինված հակամարտության արդյունք էին, որի համար երկու կողմերն էլ հավասարապես պատասխանատու էին։ Բացի այդ, ուկրաինացիները «Ուկրաինացի ազգայնականների կազմակերպությունը» և «Ուկրաինական ապստամբական բանակը» ընդհանուր առմամբ ընկալում են որպես հակասովետական, այլ ոչ թե հակալեհական կազմակերպություններ։